ނ. މާފަރުން ފެނުނީ "މިނިކާވަގެއްވެއް" ނޫން ކަމަށާއި ފެނުނު ކަމަށް ބުނާ އެތީގެ ފަރާތުން ނުރައްކަލެއް ނެތް ކަމަށް އެ ރަށު ކައުންސިލުން ބުނެފި އެވެ.
ކައުންސިލުން މިހެން ބުނީ ރަށުން ފެނުނު "މިނިކާވަގު" ހޯދަން ސިފައިން މިއަދު ހަތިޔާރާ އެކީ ރަށަށް އަރައި ހިންގި އޮޕަރޭޝަނަށް ފަހު އެވެ. އެގޮތުން އިއްޔެ "މިނިކާވަގު" ފެނުނު އެއާޕޯޓް ސަރަހައްދާއި ރަށުތެެރޭގައި ސިފައިން ހަރަކާތްތެރިވި އެވެ.
އެކަމާ ގުޅިގެން މާފަރު ކައުންސިލުން ބުނީ އެމްއެންޑީއެފުން ބެލިބެލުމުން މިނިކާވަގެއް ފަދަ ޖަނަވާރެއް ފެނިފައި ނުވާ ކަމަށެވެ.
ނަމަވެސް އިއްޔެ އާންމުވި ވީޑިއޯއެއްގައި އެއާޕޯޓް ސަރަހައްދާ ދިމާލުން ދުރުން ނަގާފައިވާ ވީޑިއޯއިން މިނިކާވަގެއް ކަހަލަ ބޮޑު ޖަނަވާރެއް ހިނގާފައި ދާ ތަން ފެނެ އެވެ.
ނަމަވެސް މިކަމާ ގުޅޭ ގޮތުން އެމްއެންޑީއެފުން ރަސްމީކޮށް ވަކި އެއްޗެއް ނުބުނެ އެވެ.