އެތަކެއް އަހަރެއް ފަހުން މާލޭގެ ރައްޔިތުންތަކަށް ގޯތި ލިބުމުން އެކަމާ ހެދި ބައެއްގެ ފިތުނައިގެ ހުޅިގަނޑު ފަޅައިގެން ގޮސްފައިވާ ކަމަށް ހުޅުހެންވޭރު ދާއިރާގެ ކުރީގެ މެމްބަރު ރީކޯ މޫސާ މަނިކު ވިދާޅުވެއްޖެ އެވެ.
މަޖިލީހުގެ ނައިބު ރައީސްކަމާއި މިހާރު ވެރިކަން ކުރާ މައި ޕާޓީ، އެމްޑީޕީގެ ޗެއާޕާސަންގެ މަގާމު ވެސް އަދާކުރެއްވި މޫސަ މިއަދު ކުރެއްވި ޓްވީޓެއްގައި ވިދާޅުވީ ރައީސް އިބްރާހިމް މުހަައްމަދު ސޯލިހުގެ ސަރުކާރުން އެތައް ހާއްސަ ބަޔަކަށް ގޯތި ޔަގިންކޮށް ދިނުމުން ވުމުން ބައެއްގެ ފިތުނައިގެ ހުޅުގަނޑު ފަޅައިގެން ހިނގައްޖެ ކަމަށެވެ.
މާލޭ މީހުނަށްގޯތި ލިބުމަކީ 50 އަހަރުއެމީހުންކުރި ދުޢާ އެކަންޙައްލުކުރުމަށް ރ ސޯލިޙު ފެއްޓެވި މަސައްކަތުގެދަށުން އެތަށްހާސްބަޔަކަށް ގޯތިޔަޤީންވުމުން މާލޭމީހުންގެ މިއުފަލުގާ ބައވެރިވުމުގެ ބަދަލުގާ މަދުބައެއްގެ ފިތުނައގެ ހުޅުގަނޑުދިޔައީ ފަޅައިގެން،
— Moosa Maniku (Reeko) (@ReekoMoosa) June 29, 2023
"މާލޭ މީހުންގެ މި އުފަލުގައި ބައވެރިވުމުގެ ބަދަލުގައި މަދު ބައެއްގެ ފިތުނައިގެ ހުޅުގަނޑު ދިޔައީ ފަޅައިގެން." އޭނަ ވިދާޅުވި އެވެ.
މޫސަ ވިދާޅުވީ މާލޭ ރައްޔިތުންތަކަކަށް ގޯތި ލިބުމަކީ އެ މީހުންގެ ބައި ގަރުނިވީ ދުއާގެ ނަތީޖާ ކަމަށެވެ.
ސަރުކާރުގެ "ބިންވެރިޔާ" ގެ ޕްރޮގްރާމްގެ ދަށުން ގޯތި ލިބުނު މީހުންގެ ފުރަތަމަ ލިސްޓް ސަރުކާރުން އާންމުކުރީ މިދިޔަ ބުދަ ދުވަހު އެވެ. އެ ލިސްޓްގައި 10،314 މީހަކު ހިމެނެ އެވެ.
ގޯތި ލިބުނު މީހުންގެ ތެރޭގައި ބިދޭސީންތަކެއް ހިމެނޭތީ އެކަމާ މިހާރު ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އަދި އިދިކޮޅު ފަރާތްތަކުން ބުނަމުން ދަނީ ރިޔާސީ އިންތިހާބު ބާއްވަން ދެ މަހެއްހާ ދުވަހަށްވެފައި ވަނިކޮށް މި ދަނޑުވަޅުގައި ގޯތި ދިނީ ސިޔާސީ މަންފާއަކަށް ކަމަށާއި މިއީ ރިޝްވަތުގެ ވެސް އަމަލެއް ކަމަށެވެ.