ރިޔާސީ އިންތިހާބަށް ސަރުކާރުން ނުފޫޒު ފޯރުވުމަށްޓަކައި ބިދޭސީންނަށް ފޭކް އައިޑީ ކާޑް ހަދައިދޭ ކަމަށް އިދިކޮޅު ޕީއެންސީގެ ނައިބު ރައީސް އާދަމް ޝަރީފު ތުހުމަތު ކުރައްވައިފި އެވެ.
ގޯތި ލިބުނު މާލޭ މީހުންގެ ލިސްޓެއް ސަރުކާރުން މިދިޔަ ބުދަ ދުވަހު އާންމުކުރި އިރު، އެ ލިސްޓްގައި ބިދޭސީންތަކެއް ހިމެނިފައިވާތީ އުފެދިފައިވާ ކަންބޮޑުވުންތަކާ ގުޅިގެން އިދިކޮޅު ފަރާތްތަކުން މިހާރު އަންނަނީ އިންތިހާބުގެ ވޯޓާސް ލިސްޓަށް ވެސް ވަރަށް ބޮޑަށް ސަމާލުވާން ޖެހިފައިވާ ކަމަށް ބުނަމުންނެވެ.
މިކަމާ ގުޅުވައި މަޑުއްވަރީ ދާއިރާގެ މަޖިލިސް މެމްބަރު ކުރެއްވި ޓްވީޓެއްގައި ވިދާޅުވީ އިންތިހާބަށް ނުފޫޒު ފޯރުވުމަށްޓަކައި ބިދޭސީންނަށް ފޭކް އައިޑީ ހަދަމުންދާ ކަމަށް ވަރަށް ބޮޑަށް ތުހުމަތު ކުރެވޭ ކަމަށެވެ.
"ގޯތި ލިބޭ ލިސްޓުން މިކަން ހާމަވޭ،" އާދަމް ޝަރީފު ވިދާޅުވި އެވެ. "މިކަން ސީރިއަސްކޮށް ބެލުމަށް ގޮވާލަން. ރިޔާސީ އިންތިހާބުގެ ވޯޓާސް ލިސްޓަށް ވެސް ފާރަވެރިވާން ޖެހޭ."
ގޯތި ލިބޭ މީހުންގެ ލިސްޓް އާންމުކުރި އިރު، އޭގައި އިންޑިއާގެ ބަޔަކު ހިމެނޭ މައްސަލަ ފެންމަތިވުމާ ގުޅިގެން ސަރުކާރުން ބުނެފައި ވަނީ އޮޅުމަކުން ތިން ބިދޭސީއެއްގެ ނަން ލިސްޓްގައި ހިމެނޭ ކަމަށެވެ. އަދި އެކަން ދާއިމީ ލިސްޓުން އިސްލާހު ކުރާނެ ކަމަށް ބުނެފައިވެ އެވެ.
ނަމަވެސް ސޯޝަލް މީޑިއާގައި ދައުރުވަމުންދާ ލިސްޓަކުން ދައްކާ ގޮތުގައި ގޯތި ލިބުނު މީހުންގެ ތެރޭގައި 10 ބިދޭސީއަކު ހިމެނެ އެވެ.