މިއީ ކަތީޖާ ބިބީ އެވެ. އިންޑިއާގެ ޓަމިލް ނާޑޫ ސްޓޭޓަށް ނިސްބަތްވާ ކަތީޖާ ވަނީ ސިއްހީ ދާއިރާ އަށް 33 އަހަރު ހިދުމަތްކޮށްފަ އެވެ. ނަރުހެއްގެ ގޮތުގަ އެވެެ. ފޫޅުމައެއްގަ އެވެ. ކަތީޖާގެ ފޫޅުމައި ކެރިއަރުގައި 10،000 ކުދިން ވިއްސާފައިވުމާއި އޭނަ ވިއްސި އެއްވެސް ކުއްޖަކު، ވިއްސުމުގެ ތެރޭގައި ކޮމްޕްލިކޭޝަންތައް ދިމާވެ، މަރު ވެސް ވެފައި ނުވާތީ ނަމިލް ނާޑޫ ސްޓޭޓް ސަރުކާރުން ހިދުމަތުގެ އަގުވަޒަންކޮށް ކަތީޖާ އަށް ހާއްސަ އެވޯޑެއް ވެސް ދީފައިވެ އެވެ.
އުމުރުން މިހާރު 60 އަހަރުގެ ކަތީޖާ ވަނީ ނަރުސްކަމުން މިދިޔަ މަހު ރިޓަޔާކޮށްފަ އެވެ. އެކަމަކު އޭނަ އަކީ އަމިއްލަ ކްލިނިކެއް ހިންގަމުން އަންނަ މީހެކެވެ. އެއީ މާބަނޑު މީހުންނަށް ހާއްސަ ތަނެކެވެ. މި ކްލިނިކްގެ ހާއްސަ ކަމަކީ ސިރޭޒިއަން ހެދުމަކާ ނުލައި، ރައްކާތެރި ގޮތުގައި ވިއްސުމެވެ.
އަދި ކަތީޖާގެ ކްލިނިކަށްދާ މާބަނޑު މީހަކު ސިޒޭރިއަން ހަދަން މަޖުބޫރުވާ ހާލަތެއްގައި ލަފާ ދެނީ އެފަދަ ހިދުމަތްދޭ ހޮސްޕިޓަލަކަށް ދިއުމަށެވެ.
ކަތީޖާ ކިޔައިދިން ގޮތުގައި ފޫޅުމައި ކަމަކީ އޭނަގެ މަންމަ ޒުލެއިހާ ފަރާތުން ވާރުތަކުރި މަސައްކަތެކެވެ. މަންމަ އަކީ އޭނަގެ ޒަމާނުގައި ވެސް އެތައް ކުދިންނެއް ވިއްސި ފޫޅުމައެކެވެ. އެކަމަކު އޭރުގެ ހާލަތުގެ ގޮތުން ވިއްސުމުގެ ތެރޭގައި މަރުވާ ކުދިން ގިނަ އެވެ. ކަތީޖާ ބުނި ގޮތުގައި މަންމަގެ ތަޖުރިބާ އިން އޭނަ އަށް ލިބުނު ފިލާވަޅުތަކުން އަބަދު ވެސް އެންމެ ބޮޑު އިސްކަމެއް ދިނީ، މާބަނޑު މީހުން ރައްކާތެރިކަމާ އެކީ ވިއްސުމެވެ.
މި ސަބަބާ ހުރެ އާންމުންގެ ތެރޭގައި އޭނަ އަށް އޮންނަ އިތުބާރާއި ޔަގީންކަން ވަރަށް ބޮޑެވެ.
ފޫޅުމައެއްގެ ގޮތުގައު ރަސްމީކޮށް ކަތީޖާ މަސައްކަތް ކުރަން ފެށީ 1990 ގެ ތެރޭގަ އެވެ. އޭނަ މީހުން ވިއްސަން ފެށި އިރު، އަމިއްލަ އަށް ހުރީ ފުރަތަމަ ދަރިފުޅަށް ބަލިވެ އެވެ.
"ފުރަތަމަ ކުއްޖާ ވިއްސަން ދިޔަ އިރު އަހަރެންގެ ބަނޑަށް ހަތް މަސް. ދެން ވިހާފައި އަނެއްކާ ދެ މަސް ދުވަސް ފަހުން އަލުން ވިއްސުމުގެ މަސައްކަތް ފެށީ." ކަތީޖާ ބުންޏެވެ.
އޭނަަ ބުނި ގޮތުގައި ފޫޅުމައިކަމަކީ އިންސާނިއްޔަތަށްކޮށްދެވޭ ވަރަށް އަގުހުރި ހިދުމަތެކެވެ. އަދި އެހާ ގިނަ ދުވަހު އެ މަސައްކަތުގައި ގިނަ އަދަދެއްގެ ކުދިން ވިއްސަން ފުރުސަތު ލިބުމަކީ ވަރަށް ބޮޑު ހިތްހަމަޖެހުމެކެވެ
ކަތީޖާ ކިޔައިދިން ގޮތުގައި އޭނަ ވިއްސި 10،000 ކުދިންގެ ތެރެއިން 50 ޖޯޑަކީ އެއްމާބަނޑު ކުދިންނެވެ. އަދި އެއްމާބަނޑު ތިން ކުދިން ވެސް ވިއްސާފައިވެ އެވެ.