"އަވާސް އޭށުން، އެކަނިއަސް އޭށުން" އެމްޑީޕީ އައްޑޫ ބޮޑު ޖަލްސާ ހުކުރު ދުވަހުގެ ރޭ ފޭދޫ ބަނދަރު މަތީ ސަރަހައްދުގައި ބޭއްވުމަށް ނިންމައިފިއެވެ.
މިދިޔަ މަހުގެ 25 ވަނަ ދުވަހުގެ ރޭ ކުރިން ބާއްވަން ހަމަޖެއްސި ޖަލްސާ ކެންސަލް ކޮށްފައިވަނީ އެރޭ ފޭދޫ ސްކޫލްގެ އިނާމް ދިނމުގެ ޖަލްސާ ބޭއްވުމާއި، މޫސުން ގޯސް ވުމުގެ ސަބަބުންނެވެ.
އެމްޑީޕީގެ ތާއިދު ބޮޑު އައްޑޫގައި، ރިއާސީ އިންތިހާބްގެ ފަހުން، ބޮޑު ޖަލްސާއެއް ބާއްވާފައި ނުވެއެވެ. އެމްޑީޕީގެ ލީޑާޝިޕްގެ ގިނަ މެމްބަރުން ބައިވެރިވާ މި ޖަލްސާގައި އެމްޑީޕީގެ މިހާރުގެ ރައީސް ކުރީގެ ރައީސް މުހައްމަދު ނަޝީދު ބައިވެރިވެޑައިގަންނަވާނެއެވެ.
ޖަލްސާ ބޭއްވުމަށް ވާން ޖެހޭ އެންމެ ފަހުގެ ތައްޔާރީތައް އެމްޑީޕީން ވަމުން އަންނަ އިރު މި ޖަލްސާގައި އައްޑޫގެ ހުރިހާ ރަށަކުން އެމްޑީޕީއަށް ތާއިދުކުރާ ފަރާތްތަކުން ބައިވެރިވާނެކަމަށް މައުލޫމާތު ލިބެއެވެ.