ރިޔާސީ އިންތިހާބު މިހާރު ގާތްގަނޑަކަށް ދޮޅު މަހަށް ގާތްވީ އެވެ. އިންތިހާބުގައި ވާދަކުރަން ނިންމާފައިވާ ބައެއް ކެންޑިޑޭޓުން މިހާރު ވެސް ކެމްޕޭން ކުރައްވަނީ އެވެ. ސެޕްޓެމްބަރު 9 ގައި ބާއްވާ އިންތިހާބުގައި ވާދަކުރަން ބޭނުންވާ ކެންޑިޑޭޓުންނަށް ނަން ހުށަހެޅުމުގު ފުރުސަތު މި މަހުގެ 23 ގައި އިލެކްޝަން ކޮމިޝަން (އީސީ) އިން ހުޅުވާލައިލާނެ އެވެ.
އިދިކޮޅު ކޯލިޝަން ޕީޕީއެމް/ޕީއެންސީން ބުނެފައިވާ ގޮތުގައި އެންމެ ފުރަތަމަ އީސީ އަށް ވަންނާނީ އެ ކޯލިޝަންގެ ކެންޑިޑޭޓް ރައީސް އަބްދުﷲ ޔާމީންގެ ފޯމެވެ. އެ ވަގުތަކަށް އެ ކޯލިޝަން އޮތީ ވަރަށް ބޮޑަށް އިންތިޒާރުކޮށްގެންނެވެ. އެކަމަކު ގިނަ ބައެއް ސަމާލުކަން ހުއްޓިފައި ވަނީ އިންތިހާބުގައި ކާމިޔާނަށް ވާދަކުރެއްވިދާނެތޯ އުފެދިފައިވާ ސުވާލަށެވެ.
ޔާމީން ހުންނެނީ 11 އަހަރުގެ ޖަލު ހުކުމެއްގަ އެވެ. އެހެންވެ މި ދަނޑިވަޅުގައި އެ މަނިކުފާނު ހުންނެވީ އިންތިހާބުގައި ވާދަކުރެއްވޭ ފަދަ ހާލަތެއްގައެއް ނޫނެވެ. ގާނޫނީ ގޮތުން އެކަމަށް ފުރުސަތު ފަހިކޮށްދޭނެ އެއްވެސް އަލާމާތެއް، އިޝާރާތެއް ނެތެވެ.
އެހެންވެ ޕީޕީއެމާއި ޕީއެންސީން އަޑަށް ބާރުލާފައި އަދި ގޮތްދޫނުކުރާ މޭރުމަކުން ތިމަންނާމެންގެ ކެންޑިޑޭޓަކީ ޔާމީނޭ ބުންޏަސް، އެކަން ބަލައިގަނެވޭނެ ހަމައެއް ނެތެވެ. ރާއްޖޭގެ އެންމެ ބޮޑު އިދިކޮޅު ޕާޓީ އަށް އިންތިހާބުގައި ވާދަކުރުމުގެ ފުރުސަތު ގެއްލި، ޕާޓީގެ މެމްބަރުން މި ފަހަރު ވޯޓްލާނެ ކެންޑިޑޭޓަކު ނެތުމަކީ ވަރަށް ދެރަވަރުގެ ކަމަކަށް ވާނެ އެވެ.
ހަގީގަތުގައި މީގެ ނަތީޖާ ގުޅިފައ އޮތީ ޔާމީންގެ ގޮތް ދޫނުކުރެއްވުމާ އެވެ. ޕީޕީއެމާއި ޕީއެންސީ އަށް މިދިޔަ ޑިސެމްބަރު މަހުގެ ފަހުކޮޅުން ފެށިގެން ކުރަން ޖެހިފައި އޮތް މަސައްކަތަކީ ޔާމީން މިނިވަންކުރަން ގޮވެލިފަތިގޮވުމެވެ. އެކަން މިހާތަނަށް ވަރަށް ފޯރި އާއި ޖޯޝާ އެކީ ކޮށްފި އެވެ. އެކަމަކު މިހާތަނަކަށް އަލިމަގެއް ފެންނާކަށް ނެތެވެ.
ޔާމީނަށް އިއްވީ "ހަރާން ހުކުމެކޭ" ބުނެ މަގުމައްޗަށް ނުކުމެ އަޑުގަދަ ކުރަން ހަދައިގެން ޕީޕީއެމާއި ޕީއެންސީ އަށް ވަގުތު ގެއްލުން ނޫން ކަމެެއް ހަގީގަތުގައި ނުވެ އެވެ. ޔާމީނާ މެދު އޮތް އުންމީދު އެއްފަރާތްކޮށްފައި ދުރާލައި ޔާމީން ނޫން ގޮތެއް ހޯދަން އެ ކޯލިޝަނަށް ހަގީގަތުގައި ވަގުތު ވެސް ލިބުނެވެ. އެކަމަކު "ޔާމީނަށް ބިރަށް" ކޯލިޝަންގެ ތެރެއިން ރިޔާސީ އިންތިހާބަށް ނުކުންނަން ބޭނުންވާ ކަމަށް ވިދާޅުވާނެ ހިތްވަރު ހުރި ބޭފުޅެއް ޕީޕީއެމް/ޕީއެންސީގެ ތެރެއަކު ނެތެވެ.
މިކަން މިހެން ގޮސް އިންތިހާބު މިއޮތް ޖެހުނީ އެވެ. އިއްޔެ އެ ކޯލިޝަނުން ވަނީ ޔާމީންގެ ރިޔާސީ ކެމްޕޭން ވެސް ފަށައިފަ އެވެ. މާލޭގައި ދޮރުންދޮރުން ޖައްސަން ފެށި ކެމްޕޭނާ އެކީ ޔާމީންގެ "ޢައިރު ހާޒިރު" ގައި އަނެއްކޮޅުން "ކޮޅެއްމެދެއް" ފެންނަން ނެތް ކަމެއް ފެށީ އެވެ.
އެހެންވެ އެ ކޯލިޝަނުން މިހާރު އެ ކުރާ ކަމަކީ "ހިޔާލީފޮލާ ކެއްކުން" ނޫން ކަމަށް ނުވާނެތޯ އެވެ؟ ނޫނީ އެ ކޯލިޝަނުން "ފޫނެއް ފަޔަށް ފެން ފުރަނީ" ކަމަށް ނުވާނެތޯ އެވެ؟
އިންތިހާބު މިހާ ބޮޑަށް ގާތްވެފައި އޮތް އިރު، ކުރީގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފައްދަވާ ޕާޓީ ދަ ޑިމޮކްރެޓްސްއާ އެކީ އިންތިހާބާ ގުޅޭ މަޝްވަރާތަކެއް ޕީޕީއެމް/ޕީއެންސީ އެބަކުރެ އެވެ. މި މަޝްވަރާތަކުގެ ތެރޭގައި ޑިމޮރެކްޓްސްގެ ފަރާތުން ގުޅިފައިވާ ކެންޑިޑޭޓެއް ނެރުމުގެ ވާހަކަތަކެއް ވެސް އެބަ ތިލަކުރެ އެވެ. އެކަމަކު އިދިކޮޅު ކޯލިޝަނުން ބުނަނީ "ޔާމީނު ނޫން އެހެން ގޮތެއް" ބޭނުން ނުވާ ކަމަށެވެ.
އެހެންވެ ޑިމޮކްރެޓްސް އިން ތިލަކުރާ އެ ވާހަކަ އިދިކޮޅުން ކޯލިޝަނިން ސިފަކުރަނީ ހިޔާލީ ވާހަކައެއްގެ ގޮތުގަ އެވެ. އެކަމަކު ބޮޑަށް މަންޒަރަށް ނަޒަރު ހިންގައިލާ އިރު ޕީޕީއެމާއި ޕީއެންސީ ހިޔާލީ ދުނިޔެއެއްގެ ތެރޭގައި އޮތް ތަނެވެ. އެކެއްގެ މައްޗަށް މުޅި ޕާޓީގެ ކުރިމަގު ގުރުބާންކުރާ ތަނެވެ.
ކޮންމެއަކަސް އިދިކޮޅު ކޯލިޝަނުން ޔާމީންގެ ކެންޑިޑޭސީ ފޯމް އީސީ އަށް ހުށަހެޅުމުން ދެން ވާނެ ގޮތެއް ބަލަން ތިބެމާ ހިނގާށެވެ.