ސްޕެލެންޑިޑް އޭޝިއާ އާއިި ޑެންކާމުގެ ޓްރެވެލް އޮޕަރޭޓަރެއް ކަމަށްވާ ޕްރީމޯ ޓުއާޒް އަދި ހެރެތެރެ ގުޅިގެން އަންނަ ޖެނުއަރީ މަހު ޑެންމާކުން ގަމަށް ޗަޓަރު ދަތުރުތަކެއް ފެށުމަށް ނިންމައިފިއެވެ.
މިދިޔަ އަހަރު ޗެކް ރިޕަބްލިކްގެ ޕްރާގުން ގަމަށް ސީދާ ދަތުރު ހަމަޖެއްސި ސްޕެލްޑިޑް އޭޝިއާ އާއި ހެރެތެރެ ރިސޯޓާއި ދެމެދު މި ދަތުރުތައް ފެށުމުގެ އެއްބަސް ވުމުގައި މިއަދު ވަނީ ސޮއިކޮށްފައެވެ.
ސްޕެލެންޑިޑް އެޝިއާގެ ފަރާތުން އެއްބަސް ވުމުގައި ސޮއި ކުރެއްވި މެނެޖިން ޑިރެކްޓަރު އަބްދުﷲ ނަސީރު ވިދާޅުވީ ޑެންމާކުން ގަމަށް ކުރާ ސީދާ ދަތުރުތައް މުޅި އަހަރަށް ދެމިގެންދާނެކަމަށެވެ. އަދި މި ދަތުރުތަކަށް ބޭނުންކުރާނީ ބޮއިން 737 މަރުކާގެ 130 މީހުންގެ ޖާގައިގެ ފްލައިޓެއް ކަމަށެވެ.
ހެރެތެރެ ހިންގާ ކްރެސެންޑާސްގެ ޖެނެރަލް މެނޭޖަރު އޯވަސީސް އޮޕަރޭޝަން މޫސާދީދީ (ދައްޔާން) މިއަދު ވިދާޅުވި މި ދަތުރުތަކުގެ ސަބަބުން ހެރެތެރެ ރިސޯޓްގެ އޮކިއުޕެންސީއަށް 35 ޕަސެންޓްގެ ކުރިއެރުމެއް ލިބިގެންދާނެކަމަށެވެ.
ދައްޔާން ވިދާޅުވީ މިދަތުރުތައް ފެށުމުގައި ދަމާސްގެ ޗެއާމަން މުހައްމަދު ސޯލިހާއި އެ ކުންފުނީގެ މެނެޖިން ޑިރެކްޓަރު އަބްދުﷲ ސޯލިހްގެ އެއްބާރުލުން ވެސް ވަރަށް ބޮޑަށް ލިބިގެން ދިޔަ ކަމަށެވެ. އަދި އެދެފަރާތައް މޫސާ ވަނީ ޝުކުރު ދަންނަވާފައެވެ.
މި ރަސްމިއްޔާތުގައި ވާހަކަ ދައްކަވަމުން އަބްދުﷲ ނަސީރު ވިދާޅުވީ އައްޑޫގެ ޓޫރިޒަމް ކުރިއެރުވުމަށް ސްޕްލެންޑް އޭޝިއާ ހިންގާ ހެޕީ މާކެޓް މުހައްމަދު ނައީމް [ހަޕީ މާކެޓް ނައީމް]ގެ އެހީތެރިކަމާއި އެއްބާރުލުން ވަރަށް ބޮޑަށް ލިބިގެން ދިޔަ ކަމަށެވެ.
އައްޑޫގައި ޓޫރިޒަމް ފުޅާ ކުރުމުގެ ގޮތުން ގިނަ މަޝްރޫއުތަކެއް ކުރިއަށްގެންދަން ވަނީ ނިންމާފައެވެ. އެގޮތުން ޑެންމާކުން ގަމަސް ކުރާ ދަތުރު ހަމަޖެއްސުމުގައި ސަރުކާރުގެ ކަމާއި ބެހޭ ފަރާތްތަކުން ބޮޑު އެއްބާރުލުމެއް ލިބިގެންދިޔަ ކަމަށް މޫސާ ވިދާޅުވިއެވެ.