މި ދުވަސްވަރު އައްޑޫގައި ޑެންޑޫ ހުން އިތުރުވަމުންދާތީ އެކަމަށް ސަމާލުވުމަށް އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އިން އިލްތިމާސްކޮށްފި އެވެ.
އެތަނުން ބުނީ ޑެންގޫ އިތުރުވަމުންދާތީ ރައްޔިތުން އެކަމަށް ސަމާލުކަންދީ އެ ބަލިން ރައްކާތެރިވުމަށް އަޅަން ޖެހޭ ފިޔަވަޅުތައް އަޅައި، މަދިރި އާލާވާ ތަންތަން ނައްތާލަން ފަރުވާތެރިވާން ޖެހޭ ކަމަށެވެ. އެގޮތުން ކުރެވިދާނެ މުހިއްމު ބައެއް ކަންކަން ވެސް ހިއްސާކޮށްފައިވެ އެވެ.
ޑެންގޫ އިން ރައްކާތެރިވުމަށް ހުމުގެ އެއްވެސް އަލާމާތެއް ފެނިއްޖެ ނަމަ ވީހާ ވެސް އަވަހަކަށް ޑޮކްޓަރަށް ދެއްކުމަށާއި އަދި ޑެންގީ ހުމުން ރައްކާތެރިވާން ވީހާވެސް ބޮޑަށް ހަށިގަނޑު ނިވާވާ ގޮތަށް ހެދުން އެޅުމަށާއި، މަދިރިން ރައްކާތެރިވުމަށް ބޭނުން ކުރާ ޒާތުގެ ލޯޝަން ބޭނުން ކުރުން ހިމެނެ އެވެ.
ޑެންގީ ހުމުގެ އަލާމާތްތަކުގެ ތެރޭގައި ހުން އައުން، ގައިގައި ރިއްސުން، ބޮލުގައި ރިއްސުން، ލޮލުގައި ރިއްސުން އަދި ހަންގަނޑުގައި ކުދި ރަތްބިހިތަކެއް ނެގުން ހިމެނެ އެވެ.
މި އަހަރު ފެށުނު ފަހުން އައްޑޫގެ ޑެންގޫ ކޭސްތަކަށް ބަލާ އިރު އެންމެ ގިނަ ކޭސްތައް ރިޕޯޓްކުރީ އެޕްރީލް މަހުގެ ތެރޭގަ އެވެ. އެއީ 39 ކޭހެވެ. އޭއީއެޗުން ހިއްސާކުރި ތަފާސްހިސާބުތަކަށް ބަލާ އިރު ޖެނުއަރީގައި 12، ފެބްރުއަރީގައި ހަތަރެއް، މާޗްގައި 34، މެއިގައި 24، މިދިޔަ މަހު 30 އަދި މި މަހުގެ މިހާތަނަށް ޑެންގޫގެ ދެ ކޭސް ރިޕޯޓްކޮށްފައިވެ އެވެ.