ކުރީގެ ރައީސް މުހައްމަދު ނަޝީދު ދަ ޑިމޮކްރެކްޓްސް އަށް ސޮއިކުރަން ހާއްސަ ޖަލްސާއެއް ބާއްވަން ނިންމައިފި އެވެ.
ނަމަވެސް އެ ޖަލްސާ ބާއްވާނެ ތާރީހެއް އަދި ހާމައެއްނުކުރެ އެވެ. ނަޝީދު އިސްކޮށް ހުންނަވައިގެން އުފައްދާ ޕާޓީ އަށް އިލެކްޝަން ކޮމިޝަން (އީސީ) މި މަހުގެ 2 ވަނަ ދުވަހު ހުއްދަ ދިނުމާ އެކީ ޕާޓީ އުފެއްދުމާ ގުޅޭ ޖަލްސާ މިދިޔަ ދުވަހުގެ ރޭ ވަނީ ބާއްވައިފަ އެވެ.
އެ ޖަލްސާގައި ނަޝީދު ބައިވެރިވެވަޑައިގަތެވެ. ކުރިން ބެލެވިފައި އޮތީ އެ ޖަލްސާގައި ނަޝީދު ޑިމޮކްރެކްޓްސް އަށް ސޮއިކުރައްވާނެ ކަމަށެވެ. އެކަމަކު އެ ރޭ ޕާޓީ އަށް ސޮއެއްނުކުރައްވަ އެވެ. އަދި ވިދާޅުވީ ޑިމޮކްރެޓްސް އަށް ސޮއިކުރައްވާނެކަމާ ދޭތެރޭ އެއްވެސް ޝައްކެއް ނެތް ކަމަށެވެ.
ނަޝީދު ރައީސްގެ މަގާމުގައި ހުންނެވި އެމްޑީޕީން ވަކިވެވަޑައިގެންނެވީ މިދިޔަ މަހުގެ 21 ގަ އެވެ.
ޑިމޮކްރެޓްސްގެ އަމާޒަކީ ޕާޓީ ވީހާ ވެސް އަވަހަކަށް ރަޖިސްޓްރީކޮށް، މި އަހަރުގެ ރިޔާސީ އިންތިހާބަށް ކެންޑިޑޭޓަކު ވެސް ނެރުމުވެ.