މި އަހަރުގެ އޭޝިއަން ސާފިން ޗެމްޕިއަންޝިޕް ފަށައިފި އެވެ.
މި މުބާރާތް ފަށަން އިއްޔެ ހަވީރު ކ. ތުލުސްދޫގައި ބޭއްވި ހަފުލާ ޝަރަފުވެރިކޮށް ދެއްވީ ރައީސް އިބްރާހީމް މުހައްމަދު ސޯލިހެވެ.
އިންޓަނޭޝަނަލް ސާފިން އެސޯސިއޭޝަންގެ އޭޝިއަން ސާފިންގ ފެޑެރޭޝަނާއި ޔޫތު މިނިސްޓްރީގެ އިތުރުން މޯލްޑިވްސް ސާފިން އެސޯސިއޭޝަން ގުޅިގެން ބާއްވާ މުބާރާތް ކުރިޔަށް ދާނީ، މި މަހުގެ 17 އަށެވެ.
މުބާރާތް ހުޅުވުމުގެ ރަސްމިއްޔާތުގައި އޭޝިއަން ފެޑެރޭޝަންގެ ފަރާތުން ރައީސަށް ހާއްސަަ ހަނދާނީ ފިލައެއް އަރުވާފައިވެ އެވެ. މީގެ އިތުރުން އެ ރަސްމިއްޔާތުގެ ތެރެއިން، ކުރިޔަށް ގެންދިޔަ "ސޭންޑް ސެރަމަނީ" ހަރަކާތުގައި، މުބާރާތުގައި ބައިވެރިވާ ޤައުމުތަކުގެ އެތުލީޓުން ބައިވެރިވި އެވެ.
ސޭންޑް ސެރަމަނީ ހަރަކާތް ރަމްޒުކޮށް ދެނީ، އެތުލީޓުން ތަފާތު ސަޤާފަތްތަކާއި އާދަކާދަތަކަށް ނިސްބަތްވި ނަމަވެސް އެތުލީޓުންގެ މެދުގައި އޮންނަ ކުޅިވަރުގެ ރޫޙާއި އެއްބައިވަންތަކަމެވެ.
އޭޝިއަން ސާފިން ޗެމްޕިއަންޝިޕަކީ 2004 ވަނަ އަހަރުން ފެށިގެން އޭޝިއާގެ ހުރިހާ ޤައުމުތަކަށް ހުޅުވާލައިގެން ކުރިއަށް ގެންދާ އޭޝިއާގެ އެންމެ ބޮޑު ރާޅާއެޅުމުގެ މުބާރާތެވެ.
މި އަހަރުގެ މުބާރާތުގައި 18 ގައުމަކުން ބައިވެރިވެ އެވެ.