ރިޔާސީ އިންތިހާބަށް ރައީސް އިބްރާހީމް މުހައްމަދު ސޯލިހުގެ ކެމްޕޭން އަތޮޅު ތެރެއިން ފެށުމުގެ ގޮތުން މިއަދު ށ. އަތޮޅަށް ފުރާވަޑައިގެންފި އެވެ.
އެ މަނިކުފާންގެ އަތޮޅުތެރޭގެ ކެމްޕޭން މިއަދު ފަށަން ހަމަޖެހިފައި ވަނީ ކޮމަންޑޫންނެވެ. މި ކެމްޕޭން ދަތުރުގެ ތެރެއިން ރައީސް މަރޮއްޓާއި ނޫމަރާ އާއި ފޯކައިދު އަށް ވެސް ވަޑައިގަންނަވާނެ އެވެ. "އުފާވެރި އަމާން ރާއްޖެ" ޝިއާރުގެ ދަށުން ކެމްޕޭން ފެށުމުގެ ރަސްމިީ ޖަލްސާ އޮންނާނީ މިރޭ ފޯކައިދޫގަ އެވެ.
އެ ޖަލްސާގެ ކުރިން މިއަދު އެ ރަށު ސިއްހީ މަރުކަޒުގެ އާ އިމާރާތާއި ބަނދަރު އަދި ފުޓްބޯޅަ ދަނޑު ރައީސް ހުޅުއްވައި ދެއްވާނެ އެވެ.
ރައީސް މި ކެމްޕޭން ދަތުރުގައި އެމްޑީޕީގެ ކޯލިޝަން ބައިވެރިން ކަމަށްވާ އަދާލަތާއި އެމްޑީއޭގެ ލީޑަރުން ވެސް ބައިވެރިވެވަޑައިގެންނަަވަ އެވެ.
ރައީސްގެ ވަފުދުގައި ހިމެނިވަޑައިގަންނަވާ ބޭފުޅުންގެ ތެރޭގައި އަދާލަތު ޕާޓީގެ ރައީސް އިމްރާން އަބްދުﷲ އާއި އެމްޑީއޭގެ ލީޑަރު އަހުމަދު ސިޔާމް މުހައްމަދާއި ފޮރިން މިނިސްޓަރު އަބްދުﷲ ޝާހިދާއި ފިނޭންސް މިނިސްޓަރު އިބްރާހިމް އަމީރާއި ޑިފެންސް މިނިސްޓަރު މާރިޔާ އަހުމަދު ދީދީ އާއި ޔޫތު މިނިސްޓަރު އަހުމަދު މަހުލޫފާއި އެޑިއުކޭޝަން މިނިސްޓަރު ޑރ. އައިޝަތު އަލީ އާއި އެންވަޔަރަމަންޓް މިނިސްޓަރު އައިމިނަތު ޝައުނާ އާއި ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަނާއި އެމްޑީޕީގެ ޕާލިމެންޓްރީ ގްރޫޕުގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އަދި ނަކަ ކުންފުނީގެ މެނޭކިން ޑިރެކްޓަރު އަހުމަދު ސައީދު މުހައްމަދު ހިމެނިވަޑައިގަނެ އެވެ.