މި އަހަރުގެ ރިޔާސީ އިންތިހާބަށް ރައީސް އިބްރާހީމް މުހައްމަދު ސޯލިހުގެ ރަނިންމޭޓްކަން ފޮރިން މިނިސްޓަރު އަބްދުﷲ ޝާހިދަށް ދޭން ރައީސަށް މަޖުބޫރުކަން އެނގިވަޑައިގަންނަވާ ކަމަށް ޕީޕީއެމަށް ނިސްބަތްވާ މަހިބަދޫ ދާއިރާގެ މަޖިލިސް މެމްބަރު އަހުމަދު ތޯރިގް ވިދާޅުވެއްޖެ އެވެ.
އެމްޑީޕީން އިއްޔެ ބޭއްވި އިވެންޓެއްގެ ފޮޓޯއަކާ އެކީ އޭނަ ކުރެއްވި ޓްވީޓެއްގައި ވިދާޅުވީ ރަނިންމޭޓް ނެގުމުގެ އިހުތިޔާރު ނެތް ވެރިއެއް ހޮވަން ހެޔޮނުވާނެ ކަމަށާއި މިއީ މަޖުބޫރު ކައިވެންޏެއް ކަމަށެވެ.
ކަނޑުވިއްކާލުމުގެ ބައިވެރިޔާ ޝާހިދުއަށް ރަނިންގ މޭޓްކަން ދިނުމަށް ރައީސް ސޯލިހަށް މަޖުބޫރުވާނެކަން އަހަރެމެންނަށް އެނގޭ. ރަނިންގ މޭޓްނެގުމުގެވެސް އިހުތިޔާރުނެތް ވެރިއެއް ހޮވަން ހެޔޮނުވާނެ. ތިއީ މަޖުބޫރު ކައިވެންޏެއް. 9 ސެޕްޓެމްބަރުގައި ބާލާނެ.
إن شاء الله#ibunoongotheh pic.twitter.com/FmmSobbc6d— Ahmed Thariq (@AhmedThaariq) July 8, 2023
"ކަނޑު ވިއްކާލުމުގެ ބައިވެރިޔާ ޝާހިދަށް ރަނިން މޭޓްކަން ދިނުމަށް ރައީސް ސޯލިހަށް މަޖުބޫރުވާނެކަން އަހަރެމެންނަށް އެނގޭ،" ތޯރިގު ވިދާޅުވި އެވެ. "ރަނިން މޭޓްނެގުމުގެ ވެސް އިހުތިޔާރު ނެތް ވެރިއެއް ހޮވަން ހެޔޮނުވާނެ. ތިއީ މަޖުބޫރު ކައިވެންޏެއް. ނުވައެއް ސެޕްޓެމްބަރުގައި [ވެރިކަމުން] ބާލާނެ."
ރައީސް މިހާރު އިންތިހާބަށް ކެމްޕޭން ކުރައްވަމުން ގެންދަވާ އިރު، ރަނިންމޭޓެއްގެ ވާހަކަ އަދި ނުދެކެވެ އެވެ. މިހާރު ރައީސްގެ ރަނިންމޭޓަކީ ޖުމްހޫރީ ޕާޓީ އަށް ނިސްބަތްވާ ފައިސަލް ނަސީމެވެ.
ރައީސް ސޯލިހު ވެރިކަމުގެ ދެވަނަ ދައުރަކަށް ވާދަކުރައްވާ އިރު، ކޯލިޝަން ބައިވެރިންގެ ގޮތުގައި ތިބީ އަދާލަތު ޕާޓީ އާއި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އެވެ. މި ޕާޓީތަކުގެ ވެރިންނާ އެކީ ރައީސް މިއަދު ވަނީ ށ. އަތޮޅަށް ކެމްޕޭން ދަތުރެއް ފައްޓަވައިފަ އެވެ.
މި ދަތުރުގެ ވަފުދުގައި ފޮރިން މިނިސްޓަރު ޝާހިދު ވެސް ހިމެނިވަޑައިގަނެ އެވެ