މި އަހަރު ބާއްވާ ރިޔާސީ އިންތިހާބުގައި 9 ގައުމެއްގައި ވޯޓްފޮށި ބަހައްޓަން އިލެކްޝަން ކޮމިޝަން އީސީ) އިން ނިންމައިފި އެވެ.
އެ ކޮމިޝަނުން މިހާރު ވަނީ ވޯޓްފޮށި ބަހައްޓާނެ ގައުމުތަކާއި ފޮށިތައް އެ ގައުމުތަކުގައި ބަހައްޓަން ނިންމި ތަންތަން ވެސް އިއުލާންކޮށްފަ އެވެ. މި ފަހަރު ވޯޓްފޮށި ބަހައްޓާ ގައުމުތަކަކީ އިންޑިއާ، ސްރީ ލަންކާ، މެލޭޝިއާ، ސިންގަޕޫރް، އިނގިރޭސިވިލާތް، ޖަޕާން، ޔޫއޭއީ އަދި ތައިލޭންޑެވެ.
އީސީން ބުނީ ވޯޓުފޮށި ބަހައްޓާނީ ރީ-ރަޖިސްޓަރީވުމަށް ހުޅުވާލައި ދޭ މުއްދަތުގެ ތެރޭގައި އެއިން ގައުމެއްގައި ވޯޓުލުމަށް މަދުވެގެން 150 މީހުން ރަޖިސްޓަރީވެފައިވާ ނަމަ ކަމަށެވެ. އެހެންވެ މިހާރު ކަނޑައަޅާފައިވާ އޮތް 9 ގައުމުގެ ތެރެއިން ގައުމެއްގައި 150 މީހުންނަށް ވުރެ މަދުން ވޯޓުލުމަށް ރަޖިސްޓްރީކޮށްފި ނަމަ، އެ ގައުމެއްގައި ވޯޓްފޮށި ނުބަހައްޓާނެ އެވެ،
އަދި ރަޖިސްޓަރީކުރި މީހުން ރަޖިސްޓްރޭޝަން ބާތިލުކޮށް އެ މީހުން ރަށްވެހިވެފައިވާ ރަށުގައި ވޯޓުލެވޭ ގޮތަށް ރަޖިސްޓަރީ ބަދަލުކުރެވޭނެ ކަމަށް ވެސް އީސީން ބުންޏެވެ. އެހެންވެ ވޯޓުލާން ރަޖިސްޓަރީކުރި މީހުންނަށް، އެހެން ވޯޓުފޮށްޓަކަށް ރީ-ރަޖިސްޓަރީ ކުރުމަށް މުއްދަތެއް ދޭނެ އެވެ.
މި އަހަރުގެ އިންތިހާބުގައި ޖުމްލަ 604 ވޯޓްފޮށި ބަހައްޓަން އީސީން އޮތީ ނިންމައިފަ އެވެ. އެއީ މާލޭގެ ރައްޔިތުން ވޯޓުލުމަށް 61 ވޯޓުފޮއްޓާއި މާލޭގައި އުޅޭ އަތޮޅުތަކުގެ ރައްޔިތުން ވޯޓުލާން ބަހައްޓާ 77 ފޮއްޓާއި ރިސޯޓުތަކުގައި ބަހައްޓާ 78 ފޮއްޓާއި ރާއްޖެއިން ބޭރުގައި ބަހައްޓާ ނުވަ ވޯޓު ފޮއްޓާއި އަތޮޅުތެރޭގެ ރަށްތަކުގައި ބަހައްޓާ 319 ވޯޓު ފޮށީގެ އިތުރުން ޖަލުތަކުގައި ބަހައްޓާ ފަސް ފޮއްޓެވެ.
އީސީން ބުނީ ރީ-ރަޖިސްޓްރޭޝަނަށް ފަހު، ވޯޓުފޮށިތަކުގެ ޢަދަދަށް ބަދަލު އައުމަކީ އެކަށީގެންވާ ކަމެއް ކަމަށެވެ. ރިޔާސީ އިންތިޚާބުގައި ވޯޓުލުމުގެ ހައްގު 282،672 މީހުންނަށް ވަނީ ލިބިފަ އެވެ.
މި އަހަރުގެ ރިޔާސީ އިންތިހާބު އޮންނާނޫ ސެޕްޓެމްބަރު 9 ގަ އެވެ.