ޓޫރިޒަމް ދާއިރާ އަށް ސްކޫލްތަކުގެ ސާނަވީ ދަރިވަރުން ހޭލުންތެރިކުރަން އަންނަ މަހު މުޅި ރާއްޖޭގައި ޕްރޮގްރާމެއް ފަށަން ނިންމައިފި އެވެ.
މިކަމާ ބެހޭ ގޮތުން ޓޫރިޒަމް މިނިސްޓްރީން ބުނީ ޕްރޮގްރާމް ހާއްސަކުރަނީ މާލެ އާއި އަތޮޅުތަކުގެ ގްރޭޑް 8،9 އަދި 10 ގެ ދަރިވަރުންނަށް ކަމަށެވެ.
މިނިސްޓްރީން ބުނި ގޮތުގައި މިއީ ދަރިވަރުންނަށް ހާއްސަ ޕްރޮގްރާމަކަށް ވިޔަސް ހޭލުންތެރިކަން އުފައްދަން ކުރިއަށް ގެންދާ މަސައްކަތުގެ ތެރޭގައި ޓީޗަރުންނާއި ސްކޫލްތަކުގެ ޕީޓީއޭތަކުގެ މެމްބަރުންނާއި ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުން ވެސް ބައިވެރިވާނެ އެވެ.
މިނިސްޓްރީން ބުނީ ޕްރޮގްރާމްގެ މައިގަނޑު އަމާޒަކީ ރާއްޖޭގެ އިގުތިސާދު އެ ދާއިރާއަކަށް ބިނާވެފައި އޮތް ޓޫރިޒަމް ދާއިރާގެ މައުލޫމާތު ވީހާ ފުޅާކޮށް ހިއްސާކޮށް، ސްކޫލް ނިންމައި ދަރިވަރުން ވަޒީފާގެ މައިދާނަށް ނުކުންނަން ތައްޔާރުވާ އިރު، ޓޫރިޒަމް ދށއިާ އަށް ލޯބި ޖައްސައި، އެ ދާއިރާ އިން ކުރިއަށްދާން ވެސް ހިތްވަރު ދިނުމެވެ.
ޓޫރިޒަމް މިނިސްޓްރީން ބުނީ ސާނަވީ ދަރިވަރުންނަކީ މިހާރު ވެސް ކުރިއަށް ދާނެ ކެރިއަރަކާ ދޭތެރޭ ފިކުރު ކުރާނެ ބަޔަކަށްވާތީ ޓޫރިޒަމް ދާއިރާ އަށް އެ ދަރިވަރުން ހޭލުންތެރިކުރުވުން މުހިއްމަ ކަމަށެވެ. ދަރިވަރުންނަށް ހިންގާ ޕްރޮގްރާމްގައި ދާއިރާގެ ތަޖުރިބާކާރުންނާއި ރިސޯޓްތަކުން ބައިވެރިވެ، މައުލޫމާތުތައް ފޯރުކޮށް ދޭނެ އެވެ.
މި ޕްރޮގްރާމް ޓޫރިޒަމް މިނިސްޓްރީން އަންނަ މަހު ފަށާ އިރު، މި އަހަރުގެ ދިރާސީ އަހަރު ވެސް އަންނަ މަހުގެ 6 ގައި ފަށާނެ އެވެ.