އެމްޑީޕީ މިހާރު އޮތީ ފޫ ވެއްޓިފައިވާ ކަމަށާއި އެ ޕާޓީ ރޫޅައިލައްވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެ މަނިކުފާނު އިސްކޮށް ހުންނަވައިން އުފެއްދެވި އާ ޕާޓީ، ދަ ޑިމޮރްކެޓްސް އަށް ރޭ ސޮއިކުރައްވަން ބޭއްވި ޖަލްސާގައި ނަޝީދު ވިދާޅުވީ އެމްޑީޕީ އަކީ ކުރިއަށް އޮތް ތަނުގައި އެކީއެކަށް ބަލިކަށިވަމުން ދާނެ ޕާޓީއެެއް ކަމަށެވެ. އަދި އެ ޕާޓީ އަކީ މާ ބޮޑު ކުރިމަގެއް ވެސް އޮތް ޕާޓީއެއް ކަމަށް ދެކެވަޑައިނުގަންވާ ކަމަށް ރާއްޖޭގެ އެންމެ ބޮޑު ސިޔާސ ޕާޓީ އުފައްދަން އެންމެ ފުރަތަމަ ސޮއިކުރެއްވި 42 މެމްބަރުންގެ ތެރޭގައި ހިމެނިވަޑައިގަންނަވާ ނަޝީދު ވިދާޅުވި އެވެ.
"ކަށިކެޔޮ ގަނޑަށް ވާ ގޮތް، ފޫވައް ދިޔައިމަ ގަނޑު ރޫޅޭނެ. އެމްޑީޕީ އެދަނީ ރޫޅެމުން. ފޫ ވެއްޓިއްޖެ. ފޫވައް ގެއްލިއްޖެ." ނަޝީދު ވިދާޅުވި އެވެ. ތި ޕާޓީ އިރާދަކުރެއްވިއްޔާ އަޅުގަނޑު ރޫޅާލާނަން. ރޫޅާލާނަން. ރޫޅާލާނަން. ރޫޅާލާނަން. ރޫޅާލާނަން. ރޫޅާލާނަން."
ނަޝީދު ވަނީ ޑިމޮކްރެޓްސްއާ ގުޅިގެން އެމްޑީޕީގެ ހުރިހާ މެންބަރުންނަށް ކުރިއަށްދާން ވެސް ގޮވާލައްވައިފަ އެވެ.
"އަޅުގަނޑު ދަންނަވާލަން އޮތީ އެމްޑީޕީގެ ހުރިހާ ބޭފުޅުންނަށް، އަޅުގަނޑު ތިޕާޓީ ރޫޅާލާނަމޭ. ރޫޅާލާނަން." ނަޝީދު ވިދާޅުވި އެވެ.
"އަޅުގަނޑު މުޅި ހަޔާތުގެ ގިނަ ދުވަސް ހޭދަކުރަމުން ގެންދިޔައީ އަނިޔާގައި ހަގީގަތުގައި. ވޭނުގައި ހިތާމައިގައި އެކަނިވެރިކަމުގައި. އަބަދުވެސް އަމާޒަކަށްވީ އުސޫލެއް ހޯދަން، ގޮތެއް ހޯދަން. ދިވެހިންނަށް މިއަދު ލިބޭ މިންވަރަށް ވުރެ ހެޔޮ ރަނގަޅު މިންވަރެއް ދިވެހިންނަށް ލިބޭ ހަމަތަކެއް އުސޫލްތަކެއް މި ރާއްޖޭގައި ތައާރަފުކުރުން."
ނަޝީދު ވިދާޅުވީ ރައްޔިތުންނަށް ތަނަވަސްކަން ހޯދައި ދިނުމަށް ޑިމޮކްރެޓްސްއިން އަބަދުވެސް މަސައްކަތް ކުރާނެ ކަމަށެވެ. އަދި އި އޮބަހައްޓައިގެން ނުވަތަ ހިފަހައްޓައިގެން ގައުމަށް ލިބޭނެ ކުރިއެރުމެއް ނެތް ކަމަށް ވެސް ވިދާޅުވި އެވެ.
"ދިވެހި ޑިމޮކްރެޓްސްއޭ ކިޔާ ޕާޓީއެއް އަޅުގަނޑުމެން ހެދީ ރާއްޖޭގެ ރައްޔިތުންގެ ތަނަވަސްކަމަށް އެ މީހުންގެ އުއްމީދާއި އެ މީހުންގެ އާންމު ހާލަތު ރަނގަޅުކޮށް ދިނުމަށް. ސާފުކޮށް އެނގިތިބީ އެއީ ވަކި ހަމަތަކެއްގެ ތެރޭގައި ވަކި ކަމެއް ވަކި އިރެއްގައި ވަކި ގޮތަކަށް ކުރީމާ ރައްޔިތުންނަށް ލިބޭ ތަނަވަސްކަމެއްކަން،" ނަޝީދު ވިދާޅުވި އެވެ. "އިންސާނީ ހައްގުތަކާއި މާތްވެގެންވާ އިސްލާމްދީނުގެ މަތިވެރި އުސޫލުތަކާއި އަދި ޑިމޮކްރެސީގެ އެންމެހާ އަސާސްތައް އަޅުގަނޑުމެންގެ ހިތްތަކުގައި ބިންވަޅުނެގި އެއަސާސްތަކުގައި ހިފެއްޓުނީމާ ގައުމުތައް ތަނަވަސްވެ މިދަނީ. އޮބަހައްޓައިގެން ހިފަހައްޓައިގެން ލިބިފައި އޮތް ކުރިއެރުމެއް ނެތް. ފިތުރަތުގެ ގޮތަކީ ކުރިއަރައި ދިޔުން. އޮބެހެއްޓުމެއް ނޫން ހިފެހެއްޓުމެއް ނޫން."
ނަޝީދު ވިދާޅުވީ ތެދުވެރިކަމާއި އިޚުލާސްތެރިކަމަކީ ގައުމަށް ބޭނުންވާ އެންމެ ބޮޑު ހަރުމުދާ ކަމަށެވެ.
"ތެދުވެރިކަމާއި އިޚުލާސްތެރިކަމަކީ ގައުމަށް ބޭނުންވާ އެންމެ ބޮޑު ހަރުމުދާ، އެއީ ނަގަންވީ ލޯނަކީ ވެސް." ނަޝީދު ވިދާޅުވި އެވެ.
ނަޝީދު ވިދާޅުވީ އެމްޑީޕީން ވަކިވެވަޑައިގަންނަން ޖެހުމަކީ އެހާ ފަސޭހަ ކަމެއް ނޫން ކަމަށާއި އެމްޑީޕީ ދޫކޮށްލަން ވަރަށް އުނދަގޫވި ކަމަށެވެ.
"އަޅުގަނޑުވެސް އިންތިހާއަށް ދެރަވަމުން ދިޔަ އެމްޑީޕީ ދޫކޮށްލަން. ވަރަށް އުނދަގޫވި." ނަޝީދު ވިދާޅުވި އެވެ.