މިއަހަރުގެ ރިޔާސީ އިންތިހާބުގައި ވާދަކުރުމަށް ނިންމާފައިވާ ކުރީގެ ހޯމް މިނިސްޓަރު އުމަރު ނަސީރު މާލޭގައި މިއަދު ދޮރުން ދޮރަށް ހިނގުމުގެ ހަރަކާތެއް ކުރިއަށް ގެންގޮސްފި އެވެ.
އުމަރު ވަނީ މި ހަރަކާތުގައި މާލޭގެ އެކި ގެތަކަށް ޒިޔާރަތް ކުރައްވައި ރައްޔިތުންގެ ހާލު ބައްލަވާލާފަ އެވެ. އެގޮތުން އޭނާގެ ވެރިކަމެއްގައި ރާއްޖެ އަށް ދިމާވެފައިވާ ބޯހިޔާވަހިކަމުގެ މައްސަލަ އަށް ހައްލެއް ގެނައުމަށް ހާއްސަ އިސްކަމެއް ދެއްވާނެ ކަމަށް އުމަރު ވަނީ ވިދާޅުވެފަ އެވެ.
އުމަރު ކެމްޕެއިން ރަސްމީކޮށް ލޯންޗްކުރީ މިދިޔަ ފެބްރުއަރީ މަހުގެ ހަތަރުވަނަ ދުވަހު އެވެ. ކެމްޕެއިން ލޯންޗު ކުރުމަށް ބޭއްވި ޖަލްސާގައި އުމަރު ވަނީ އޭނާގެ މައިގަނޑު ސިޔާސަތުތައް އާންމުކޮށްފަ އެވެ. އެގޮތުން އޭނާގެ ވެރިކަމެއްގައި އިސްލާމީ ޝަރީއަތުގައިވާ ހުކުމްތައް ތަންފީޒު ކުރާނެ ކަމުގެ ޔަގީންކަން އުމަރު ވަނީ އަރުވާފަ އެވެ.
ރިޔާސީ އިންތިހާބުގައި އުމަރު ވާދަކުރުމަށް ހަމަޖެހިފައި ވަނީ އަމިއްލަ ކެންޑިޑޭޓެއްގެ ގޮތުގަ އެވެ.
ރިޔާސީ އިންތިހާބަށް ކުރިމަތިލާން އަންނަ އާދިއްތަ ދުވަހު ހުޅުވާލާ އިރު، އެ ފުރުސަތު އަންނަ މަހު 7 އަށް ހަމަވާނެ އެވެ. އިންތިހާބު އޮންނާނީ ސެޕްޓެމްބަރު 9 ގަ އެވެ.