ރަނިންމޭޓެއްގެ މަޝްވަރާތައް މިހާރު ކުރިއަށްދާ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
އެ މަނިކުފާނު ކެމްޕޭނަށް މ. އަތޮޅާއޮ ވ. އަތޮޅަށް ކުރެއްވި ދަތުރު ނިންމަވާލައްވައި ނޫސްވެރިންނާ ބައްދަލުކުރައްވައި ވިދާޅުވީ ރަނިންމޭޓެއް ކަނޑައެޅުމަކީ އުނދަގޫ ނިންމުމަކަށް ވިޔަސް އެކަމުގެ މަޝްވަރާތައް މިހާރު ކޯލިޝަން ޕާޓީތަކާ އެކީ ކުރިއަށްދާ ކަމަށެވެ. އެމްޑީޕީގެ ކޯލިޝަން ބައިވެރިންނަކީ އަދާލަތު ޕާޓީ އާއި އެމްޑީއޭ އެވެ.
"އަޅުގަނޑުގެ ސިކުނޑީގައި މި ވަގުތި އިން އެންމެ ބޮޑު މައްސަލަ އަކީ އެއީ. މައްސަލައޭ މި ދެންނެވީ ޑިސިޝަނެއް ނަގަން ޖެހިފައި އޮތް މައްސަލައެއްވީމަ. އަޅުގަނޑު ވަކިވަކިން ޕާޓީގެ އިސް ބޭފުޅުންނާ އެބަ ވާހަކަ ދައްކަން،" ރައީސް ވިދާޅުވި އެވެ. "އެ ބޭފުޅުންގެ ވިސްނުމާ ހިޔާލު އަޅުގަނޑު އެބަ ހޯދަން. ކޮންމެ ދުވަހަކު ކޮންމެ ރެއަކު ކަހަލަ ގޮތަކަށް ވަކިވަކިން އަޅުގަނޑު އެބަ ބައްދަލުކުރަން. އެކި ނަންތައް އެބަ އާދޭ."
ރައީސް ވިދާޅުވި ގޮތުގައި ކޯލިޝަނުގެ ތެރެއިން ރަނިންމޭޓެއް ކަނޑައެޅުމުގެ ފުރުސަތު އޮންނާނެ އެވެ.
ދެހާސް އަށާރަ ވަނަ އަހަރުގެ ރިޔާސީ އިންތިހާބު ރައީސް ކާމިޔާބު ކުރެއްވީ ޖުމްހޫރީ ޕާޓީ (ޖޭޕީ) އަށް ނިސްބަތްވާ ފައިސަލް ނަސީމު ގޮވައިގެން ނުކުންނަވައި އެވެ. ނަމަވެސް އޭރު ކޯލިޝަންގައި އެ ޕާޓީ ހިމެނުނަސް ޖޭޕީ އަކީ މި އަހަރުގެ ރިޔާސީ އިންތިހާބުގައި ވާދަކުުރަން ނިންމާފައިވާ ޕާޓީއެކެވެ.
އެ ޕާޓީގެ ކެންޑިޑޭޓަކީ ގާސިމު އިބްރާހީމެވެ.