ރައްޔިތުންގެ މަޖިލީހުގެ ދެން އޮންނަ ދައުރަކަށް ހަ ގޮނޑި އިތުރުވާނެ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
މިހާރު މަޖިލީހުގެ މެމްބަރުންގެ އަދަދަކީ 87 އެވެ. ނަމަވެސް އަންނަ އަހަރު އިންތިހާބުކުރާ 20 ވަނަ ދައުރާ އެކީ އިތުރުވާ ހަ ގޮނޑީގެ ސަބަބުން މެމްބަރުންގެ އަދަދު 93 އަށް އަރާނެ އެވެ.
އީސީގެ ނައިބު ރައީސް އިސްމާއީލް ހަބީބު މިއަދު ކުރެއްވި ޓްވީޓެއްގައި ވިދާޅުވީ ހަ ގޮނޑި އިތުރުވާ ދާއިރާތަކުގެ ތެރޭގައި ހިމެނެނީ މާލެ އާއި އައްޑު އާއި ބ. އަތޮޅާއި މާލެ އަތޮޅާއި ގއ. އަތޮޅު ކަމަށެވެ. އެގޮތުން ގޮނޑިތައް ބެހޭ ގޮތަށް ބަލާ އިރު، މާލެ އަށް ދެ ގޮނޑި އަދި އަނެއް ދާއިރާތަކުން ކޮންމެ ދާއިރާއަކަށް ގޮނޑިއެއް އިތުރުވާނެ އެވެ.
އީސީން ބުނީ ކޮންމެ ދާއިރާއަކަށް ރަޖިސްޓްރީ ކުރެވިފައިވާ ޖުމްލަ އާބާދީތަކުގެ ތަފުސީލު ވަރަށް އަވަހަށް އާންމުކުރާނެ ކަމަށެވެ.