އައްޑޫ ސްޓޭޑިއަމްގައި ދާއިމީ ލައިޓް ޖެހުމަށް ދެ ފަރާތަކާއި މަޝްވަރާ ކުރަމުން އަންނަ ކަމަށް ކުޅިވަރާއި ބެހޭ ވަޒީރު، މުހައްމަދު މަލީހް ޖަމާލް ވިދާޅުވެއްޖެއެވެ.
"އައްޑޫލައިވް"އިން ދެންނެވި ސުވާލަކަށް ޖަވާބު ދެެއްވަމުން މަލީހް ވިދާޅުވީ، ސްޓޭޑިއަމްގެ ލައިޓް ޖެހޭނެ ވަކި ދުވަހެއް އަދި ދަންނަވަން ނޭގޭ ކަމަށާއި، ދެ ފަރާތަކާއި މަޝްވަރާކޮށް މަސައްކަތަށް ހިގާނެ ހަރަދު ބަލަމުން އަންނަ ކަމަށެވެ.
"އަޅުގަނޑުމެން މިދަނީ ދެ ފަރާތަކާއި ބައްދަލުކޮށް އަގުތައް ބަލަމުން، އޭގެ ތެރޭގައި މިހިމެނެނީ ސްޓެލްކޯ އާއި ކުރިން އައްޑޫ ސްޓޭޑިއަމްގައި ވަގުތީ ލައިޓް ޖަހައިދިން ލަންކާ ކުންފުނި."
މަލީހް ވިދާޅުވީ މިއަހަރު ފަހުކޮޅު ބާއްވަން ކުރިން ނިންމި ރާޖަޕަކްސަ އިންޓަނެޝަނަލް ފުޓްބޯޅަ މުބާރާތް އަންނަ އަހަރަށް ލަސްކޮށްފައި ވާ ކަމަށެވެ. އަދި މުބާރާތް ބާއްވާ ވަކި ތާރީހެއް ލަންކާގެ ކުޅިވަރާއި ބެހޭ އިދާރާއިން އަންގާފައި ނުވާކަމަށެވެ.
މިއަހަރު މޭއި މަހު އޭއެފްސީ ޗެލެންޖް ކަޕް ބޭއްވުމަށް ސްޓޭޑިއަމް ތަރައްޤީ ކުރުމަށް ހިންގި މަޝްރޫއުގެ ތެރެއިން ދަނޑު ކުރިން ދިއްލަން ބޭނުން ކުރި ލައިޓިން ސިސްޓަމް ވަނީ މުޅިން ހަލާކު ކޮށްލާފައެވެ. އެހެންވެ، ރޭގަޑު މުޅި ސްޓޭޑިއަމް އަންނަނީ ވަރަށް އަނދިރިކޮށެވެ.
މަލީހް ވިދާޅުވީ، ސްޓޭޑިއަމް ދިއްލުމަށް މާކަރީ ލައިޓް ޖެހިދާނެކަމަށެވެ. ނަމަވެސް އަދި އެފަދަ އެއްވެސް މަސައްކަތެއް ފެށިފައި ނުވެއެވެ.
ދައުލަތުން ބޮޑު ހަރަދެއް ކޮށްގެން އިމާރާތް ކޮށްފައިވާ ސްޓޭޑިއަމްގެ އެކިތަންތަނުގެ ފާރުގައި ރެނދުލައި، ބައެއް ތަންަތނުގެ ސީލިންގ ތެރެއަށް ފެންފައިބާ ތަންވަނީ ވަރަށް ބޮޑަށް ހަލާކުވެފައެވެ. އަދި ވާރޭ ވެހޭ ދުވަސްތަކުގައި ސްޓޭޑިއަމްގެ ސިޑި ދަށުގައި ހަދާފައިވާ ބައެއް ތަންތަނަށް ފެންވަދެ ފެންގަޑު ބޮޑުވެއެވެ.