ދެން އިންތިހާބުކުރާ ރައްޔިތުންގެ މަޖިލީހަށް މެމްބަރުން އިތުރުވާނެތީ އެއީ ތާއީދު ކުރެވޭ ގޮތެއް ނޫން ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ކެންޑިޑޭޓް ކާނަލް މުހައްމަދު ނާޒިމު ވިދާޅުވެއްޖެ އެވެ.
އިލެކްޝަން ކޮމިޝަން (އީސީ) އިން އިއްޔެ ބުނެފައިވާ ގޮތުގައި އަންނަ އަހަރު އިންތިހާބުކުރާ މަޖިލީހުގެ 20 ވަނަ ދައުރަށް ހަ ގޮނޑި އިތުރުވެ، މެމްބަރުންގެ އަދަދު 93 އަށް އަރާނެ އެވެ. ގޮނޑި އިތުރުވާ ދާއިރާތަކަށް ބަލާ އިރު، މާލެ އަށް ދެ ގޮނޑި، ބ. އަތޮޅަށް އެއް ގޮނޑި، ކ. އަތޮޅަށް އެއް ގޮނޑި، ގއ. އަތޮޅަށް އެއް ގޮނޑި އަދި އައްޑު އަށް ގޮނޑިއެއް އިތުރުވާނެ އެވެ.
މިހާރު ހިނގަމުން އަންނަ މަޖިލީހުގެ 19 ވަނަ ދައުރުގެ މެމްބަރުންގެ އަދަދަކީ 87 އެވެ.
މެމްބަރުންގެ އަދަދު އިތުރުކުރުމާ ގުޅޭ ގޮތުން ކަންބޮޑުވުން ފާޅުކުރައްވައި ނާޒިމު ވިދާޅުވީ މެމްބަރުން އިތުރުނުކޮށް، މިހާރު އޮތް އަދަދު ދަމަހައްޓަން ޖެހޭ ކަމަށެވެ. އޭނަ ޓްވިޓާގައި ވިދާޅުވީ މަޖިލިސް މެމްބަރުންގެ އަދަދު ހައްދެއް ނެތް މިންވަރަށް އިތުރުވާ ގޮތަށް އޮންނަން ތާއީދު ނުކުރައްވާ ކަމަށެވެ.
"މިކަމަށް ނިމުމެއް ގެނައުމަށްޓަކައި ރައްޔިތުންގެ މަޖިލީހުގެ ދެން ފެށޭ ދައުރުގައި ގާނޫނުއަސާސީ އިސްލާހުކުރުމަށް އެމްއެންޕީން ހުށަހަޅާނަން." ނާޒިމު ވިދާޅުވި އެވެ.
މަޖިލީހަށް މެމްބަރުން އިތުރުވާ ގޮތަށް ހަމަޖެހޭ އިރު، މިހާރު ވެސް މަޖިލީހުގެ މެމްބަރުން ގިނަ ކަމަށާއި މެމްބަރުންނާ ލިބޭ މުސާރަ އާއި އިނާޔާތްތަކާ އެއްވަރުގެ މަސައްކަތްތަކެއް ނުކުރޭކަމުގެ ކަންބޮޑުވުން އާންމުންގެ ތެރޭގައި އެބައޮތެވެ.