ސޮސައިޓީފޯރ ހެލްތް އެޑިއުކޭޝަން(ޝީ) އާއި އައްޑޫ ސިޓީ ކައުންސިލް އަދި ޑޮކްޓަރސް އެސޯސިއޭޝަން ގުޅިގެން މަލްޓި ޕަރޕަސް ހެލްތު ކޭމްޕް ގެ ނަމުގައި ކޭންޕެއް އައްޑޫ ގައި ބާއްވަން ނިންމައިފިއެވެ.
މިކޭޕްމްޕް އައްޑޫގައި ކުރިއަށް ގެންދިއުމަށް ނިންމާފައިވަނީ މި މަހުގެ 16 އިން 21 އަށެވެ. އެގޮތުން މި ކޭމްޕްގެ ހަރަކާތް އައްޑޫގެ ހުރިހާ ރަށެއްގައި ކުރިއަށް ގެންދިއުމަށް ވަނީ ނިންމާފައެވެ.
މި ހަރަކާތުގައި، ޝީ އިން ފޯރުކޮށްދޭ ގިނަ ޚިދުމަތްތަކެއް ފޯރުކޮށްދެވޭނެކަމަށް މަޢުލޫމާތު ލިބިފައިވެއެވެ.
ހިލޭ ޑޮކްޓަރަށް ދެއްކުމުގެ އިތުރުން ދަރިމައިވުމުގެ ސިއްހަތާއި، ތެލަސީމިއާއަށް ޓެސްކޮށްދިނުމާއި، އެޗް.އައި.ވީ އެއިޑްސް އާއި ބެހޭ މައުލޫމާތު ދިނުމާއި، އެޗް އައި ވީ އެއިޑްސް އަށް ޓެސްޓް ކޮށް ވަޤުތުން ނަތީޖާ ދޫކޮށްދޭ ގޮތަށް ހަމަޖެހިފައިވާކަމަށް ޙަބަރު ލިބެއެވެ. އަދި ސެސަންތަކުގެ އިތުރުން ސިއްޙީ، އިޖްތިމާއި އެހެނިހެން މައުލޫމާތު ދިނުމަށްވެސް ވަނީ ހަމަޖެހިފައެވެ.
މި ހަރަކާތްތައް އައްޑޫން ބޮޑު ތަރުހީބެއް ލިބޭނެކަމަށް އެ ސޮސައިޓީއިން އުންމީދުކުރެއެވެ.
1990 އަހަރުން ފެށިގެން ޝީއިން ދަނީ މިފަދަ ހެލްތް ކޭމްޕް ތައް ރާއްޖޭގެ އެކި ހިސާބުތަކުގައި ބާއްވަމުންނެވެ.
އެގޮތުން މިހާތަނަށް 16 އަތޮޅަކަށް ޝީގެ ޚިދުމަތް ވަނީ ފުޅާކޮށްފައެވެ. އަދި އައްޑޫގައި މިމަހު ބާއްވާ ކޭމްޕަކީ އެ ޖަމިއްޔާއިން ރާއްޖޭގައި ބާއްވާ87 ވަނަ ކޭންޕެވެ.
ޝީއިން ބުނީ އަތޮޅުތަކަށް ދަތުރުކޮށް މިފަދަ ކޭމްޕްތައް ބޭއްވުމުގެ އެންމެ ބޮޑު ބޭނުމަކީ ގިނަ ޢަދަދެއްގެ ރައްޔިތުންނަށް މި ޚިދުމަތްތައް ފޯރުކޮށްދިނުމެވެ. އަދި ގިނަ ފަރާތްތަކަކުން މިފުރުޞަތުގެ ބޭނުން ހިފުމަށް އެ ސޮސައިޓީއިން އެދެއެވެ. ޝީ އިން މިފަދަ ސިއްޚީ މައުލޫމާތު ފޯރުކޮށްދިނުމުގެ ބައްދަލުވުންތައް އިތުރަށް ކުރިއަށް ގެންދިއުމަށް ހަމަޖައްސާފައިވާ ކަމަށްވެސް ސޮސައިޓީ ފޮރ ހެލްތް އެޑިޔުކޭޝަންއިން މަޢުލޫމާތު ދެއްވައެވެ.