ސެޕްޓެމްބަރުގައި ބާއްވާ ރިޔާސީ އިންތިހާބުގެ ކުރިން ރައީސް އިބްރާހީމް މުހައްމަދު ސޯލިހު ހައްޔަރުކުރަން އިދިކޮޅު ކޯލިޝަނުން ރޭ ގޮވާލައިފި އެވެ.
ޕީޕީއެމް ހިންގެވުމުގައި މިހާރު އިސްކޮށް ހުންނެވި، އަދި އެ ޕާޓީއާ ގުޅިފައިވާ ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވީ އިންތިހާބުގެ ކުރިން ސިފައިން ނުކުމެ ރައީސް ހައްޔަރުކުރަން ޖެހޭ ކަމަށެވެ. އޭނަ އޭނާ ވިދާޅުވީ ރައީސް ސޯލިހަކީ ރާއްޖެއަށް ގައްދާރުވެފައިވާ ބޭފުޅެއް ކަމަށާއި އެ މަނިކުފާނަކީ ދިވެހިންގެ ފަސްގަނޑަކަށް އަރުވަން ހެޔޮވާ ވަރުގެ ބޭފުޅެއް ވެސް ނޫން ކަމަށެވެ.
އަދުރޭ ވިދާޅުވި ގޮތުގައި ދިވެހި، މުސްލިމް ނަމެއް ކިޔަސް ރައީސް ސޯލިހަކީ ދިވެއްސެއް ވެސް ނޫނެވެ. އެހެންވެ ސަލާމަތީ ބާރުތަކަށް ރައީސާއި އެ މަނިކުފާނުގެ އަރިސް ބޭފުޅުން ހިފައި ހައްޔަރުކުރަން އަދުރޭ ގޮވާލެއްވި އެވެ.
ރައީސް ހައްޔަރުކުރަން އިދިކޮޅުން ގޮވާލި އިރު، އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް އަބްދުﷲ ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެކަމަކު ސެޕްޓެމްބަރު 9 ގައި ބާއްވާ އިންތިހާބުގައި އެ މަނިކުފާނު ވާދަ ކުރައްވައި އިންތިހާބު ކާމިޔާބު ކުރައްވާނެ ކަމަށް ވެސް ޕީޕީއެމާއި ޕީއެންސީން ދަނީ ބުނަމުންނެވެ.
ރިޔާސީ އިންތިހާބު ފަސްކުރަން ވެސް މި ހަފުތާގައި އަދުރޭ ގޮވާލައްވާފައިވެ އެވެ.