މި މަހުގެ ކުރީކޮޅު އަލަތު ދަރިފުޅު ލިބުނު އިންޑިއާގެ ކުރީގެ ބަތަލާ ސަނާ ޚާންގެ ދަރިފުޅަށް ކިޔަނީ ސައްޔިދު ތާރިގު ޖަމީލު ކަމަށް ބުނެފި އެވެ.
ދަރިފުޅާ އެކީ ނަގާފައިވާ ވީޑިއޯއެއް ސޯޝަލް މީޑިއާގައި ޕޯސްޓްކޮށް، އޭގައި ވަނީ ކުއްޖާގެ ނަން ފުރަތަމަ ފަހަރަށް ހިއްސާކޮށްފަ އެެވެ. ސަނާ އާއި މުފްތީ އަނަސް ސައްޔިދުގެ ފުރަތަމަ ދަރިފުޅު އުފަންވީ މި މަހުގެ 8 ގަ އެވެ. އެ ދެ މީހުން ކައިވެނިކުރީ 2020 ގަ އެވެ.
ސަނާ ބުނި ގޮތުގައި ދަރިފުޅަށް ނަމެއްކީ އިރު، މާނަ ރީތި އިސްމާލީ ރީތީ ނަމަކަށް ވަރަށް ބޮޑަށް ބެލި ކަމަށެވެ. އަދި ސައްޔިދު ތާރިގު ޖަމީލުގެ މާނަ ވަރަށް ރީތި ކަމަށާއި އެ ނަމާ ދޭތެރޭ ވަރަށް ހިތްހަމަޖެހޭ ކަމަށް ވެސް ބުންޏެވެ.
ސަނާ ބުނީ ނަމަކީ ކުއްޖަކު ބޮޑުވަމުން އަންނަ އިރު، ރަނގަޅު ގޮތުގައި ކުއްޖާ ތަރުބިއްޔަތުވާން ބާރު އަޅާ ކަމެއްކަން ދީނުގައި ވެސް އޮންނަ ކަމަށާއި ދަރިފުޅަށް ކީ ނަމުގެ ސަބަބުން ދީންވެރި ނަމޫނާ ދަރިއަކު ބިނާކުރެވޭނެ ކަމަށެވެ.
ސަނާ ވަނީ ކައިވެނި ކުރި ފަހުން، ދެ ފަހަރަށް އުމްރާވެ، ހައްޖުގެ އަޅުކަން ވެސް އަދާކޮށްފަ އެވެ.