އެމެރިކާގެ ބޮޑެތި މުއައްސަސާތަކުގެ ކޮމްޕިއުޓަރުތައް ހެކްކޮށްގެން، އެފަދަ މައްސަލަތަކުގައި އަދަބުތަކެއް ވެސް ލިބިފައިވާ އެ ގައުމުގެ މަޝްހޫރު ހެކަރު ކެވިން މިޓްނިކް މަރުވެއްޖެ އެވެެ.
މިޑީއާތަކުން ބުނީ އުމުރުން 59 އަހަރުގައި އޭނަ މަރުވީ މި މަހުގެ 16 ގައި ކަމަަށެވެ. ކެލިފޯނިއާ އަށް އުފަން ކެވިން މަރުވި އިރު، އޭނަ ގެންދިޔައީ ކެންސަރަށް ވެސް ފަރުވާ ހޯދަމުންނެވެ. ކޮމްޕިިއުޓާ ކޮންސަލްޓެންޓެއްގެ ގޮތުގައި ކުރިން މަސައްކަތްތަކެއް ކުރި ކެވިން ކޮމްޕިއުޓަރު ހެކްކުރުމާއި ސައިބާއާ ގުޅުން ހުރި ބޮޑެތި ޖަރީމާތައް ހިންގަން ފެށީ 1979 ގަ އެވެ.
އޭގެ ފަހުން އާންމުންގެ ތެރޭގައި އޭނަ މަޝްހޫރުވީ "ލެޖެންޑަރީ ހެކަރެއް" ގެ ގޮތުގަ އެވެ. ކޮމްޕިއުޓަ ހެކްކުރުމުގެ މައްސަލަތަކާ ގުޅިގެން ޖެވިން ފަސް އަހަރުގެ ޖަލު ހުކުމެއް ވެސް ތަންފީޒުކޮށްފައިވެ އެވެ. އޭނަގެ ބައޯގްރަފީއެއް ވެސް ނެރެފައިވެ އެވެ. އެއީ 2011 ގައި ނެރުނު "ގޯސްޓް އިން ދަ ވަޔާސް: މައި އެޑްވެންޗާ އޭސް ދަ ވޯލްޑްސް މޯސްޓް ވޯންޓެޑް ހެކާ" އެވެ.
މީޑިއާތަކުން ބުނި ގޮތުގައި ކެވިންގެ އާ ބައޯގްރަފީއެއް އަންނަ މަހުގެ 1 ގައި ނެރެން ވެސް މިހާރު އަންނަނީ ތައްޔާރުވަމުންނެވެ. އޭނަ މަރުވި އިރު، އަންހެނުން ކިމްބަލީ މިޓްނިކް އިނީ އަލަތު ދަރިފުޅަށް ބަލިވެ އެވެ.