މިވަގު ރާއްޖޭގެ ސިޔާސީ މަސްރަޙުގައި ތިބި އައު މޫނުތަކެއް ނޫނެވެ. ސިޔާސީ ކަންކަމުގައި އުޅޭތާ އަހަރުތަކެއް ވެފައިވާ މީހުންނެވެ. މިފަހަކަށް އައިސް އެންމެ ގަދައަށް ދެކެވޭ އެއް ވާހަކައަކީ ޒުވާނުންގެ ޝައުޤުވެރިކަން ސިޔާސީ ދާއިރާއަށް ނެތް ވާހަކައެވެ. ވެރިކަން ކުރަން ކޮންމެ މީހަކުވެސް "ވަރިހަމަ" ޒުވާނުން ތިބި ކަމަށް އެކި ފަރާތްތަކުން ނަގާ ހިޔާލު ހޯދުމުގެ ޕޯލްތަކުން ދައްކައެވެ.
އަލަށް އުފެދުނު ޑިމޮކްރެޓްސް ޖަލްސާއަށް ގިނަ ބައެއް ލޯ ހުއްޓިގެން ދިޔައީ، ޒުވާނެއްގެ ޖޯޝުން ފުރިގެންވާ ވާހަކަތާކާއި ހެދިއެވެ. އެ ޒުވާނާ ދެއްކި ވާހަކައަކީ އައު ވާހަކައެއް ވެސް ނޫނެވެ. ނަމަވެސް ސިޔާސީ ޕޯޑިއަމްތަކަށް އަރައި، ސިޔާސީ ވެރިން އާންމުކޮށް ނުދައްކާ ވާހަކައެވެ. ރާއްޖޭގެ ޒުވާނުންގެ ހާލަތުގެ ވާހަކައެވެ. އެކަން އެހެން ވެގެން ދިޔަ ސަބަބުތައް ހިއްސާ ކުރިއެވެ. އޭނާގެ ވާހަކަތަކަށް ވަކި ފިކުރެއް ވަކި ޕާޓީއެއް ބެލުމެއް ނެތި ތާޢީދު ކުރިއެވެ.
!Powerful in every way@FathmathHamdha 🫶🏾
"ރާއްޖެއަކީ ވަރަށް ސްޓޭބްލް ގައުމެކޭ ބުނާބުނުން…މިއީ ކިހާ ވަރެއްގެ ޙަޤީގަތެއްތޯ…"
"ޒުވާނުން މިތިބީ އަވަދިވެފަ!" pic.twitter.com/9KW0wb5tPk
— Eva Abdulla 🎈❓ (@evattey) July 24, 2023
"ރާއްޖޭގެ މިވަގުތު އަޅުގަނޑުމެންގެ މެންޓަލް، ފިނޭންޝަލް އަދި ސައިކޮލޮޖިކަލް ސްޓެބިލިޓީއެއް އެއްގޮތަކަށްވެސް ނެތް" ޖަލްސާގައި ޒުވާނުންގެ ކަންބޮޑުވުންތަކުގެ ވާހަކަ ދައްކަވަމުން ހަމްދާ ފަށައިގަތެވެ. އައިލީ މައްސަލަތަކާއި، ދިރިއުޅުގެ ޙަރަދު ހަމަޖައްސަން ވަޒީފާގެ އިތުރުން އެހެން މަސައްކަތެއް ކުރަން ޖެހުމާއި، ކިޔެވުމުގެ ކަންކަމުގެ ޝާމިލުވެގެން ޒުވާނުން ތިބީ "އަވަދި ވެފައި" ކަމަށް ހަމްދާ ފާހާގަކުރިއެވެ.
މިއީ މިއަދުގެ ހަގީގަތެވެ. ކުލި ދައްކައިގެން ވަކިން އުޅޭ ޒުވާނުންނަށް މިއަދު ޖެހިފައި މިއޮތީ "ޕޭއި ޗެކް ޓު ޕޭއިޗެކް" ދިރިއުޅުމެއް ނުވަތަ މަހު މުސާރައިން ލިބޭ އެއްޗަކުން ހުރިހާ ޙަރަދެއްކޮށް އިތުރު ކަމެއް ކުރާނެ ލާރިއެއް ނެތިގެން އުޅެން ޖެހިފައެވެ. ހަމްދާ މިކަން ސިފަ ކުރީ ދިރިހުރުމަށް ކުރާ ހަނގުރާމައިގެ "ލޫޕެއް" ގޮތުގައެވެ. ދުވަހުގެ 24 ގަޑިއިރުވެސް މަދުވެ ހީލަންވެސް ހަނދާންނެތި އަބަދު ހާސްކަމެއްގެ ތެރޭގައި އުޅެން މަޖުބޫރު ވެފައިވާ ޒުވާނާގެ ހާލަތަކީ މިއީ އެވެ.
އޭނާގެ ވާހަކައިގައި ރާއްޖޭގެ އާބާދީ ދަށަށް ދިއުމާއި ގުޅޭގޮތުންވެސް ވާހަކަ ދެއްކިއެވެ. ޒުވާނުން އުޅެމުން މިދާ ހާސްކަން ތަޖުރިބާކޮށްފަ، އެ ކަމުގެ ތެރެއަށް ދަރިން ކިތަންމެ ބޭނުންވިއަސް އުފަން ކުރުވަން ބޭނުން ނުވާނެ ވާހަކަ ފާހަގަ ކުރިއެވެ.
ހަމްދާގެ ވާހަކަތައް ކިތަންމެ ސާފުވެފައި ތިލަ ވިއަސް، މިވާހަކަތައް އަޑުއަހަން ބޭނުންވަނީ ސިޔާސީ މީހުންނެވެ. އެ ޒުވާނާ އެ ދައްކުވައިދިނީ، އައު ޖީލުގައިވެސް ސިޔާސީ ކަންކަމުގައި ނިކުމެ ބަސް ބުނެވޭނެ ކެރުން ހުރި ކަމެވެ. އެހެނަސް މިވީހާ ދުވަހުވެސް ޒުވާނުންގެ އަޑު އަހަން ތިބީ މަދު ބައެކެވެ. ސިޔާސީ ވެރިންގެ ވަޢުދު ނާމާ ތަކުން ފެންނަނީ ޢުމްރާނީ ތަރައްޤީގެ ވާހަކަ އެކަނިއެވެ. ކޮންމެވެސް ބަޔަކަށް ކަމެއް ހިލޭ ކޮށްދޭނެ ކަމުގެ ވަޢުދެވެ.
ޒުވާންނެއްގެ ހިތުގެ ސުޢޫރު @FathmathHamdha
👏👏👏#HappeningNow #WeTheDemocrats pic.twitter.com/9bxusS1SNF— Sim (@Simwarr) July 23, 2023
ޒުވާނުންނަށް ވަމުންދާ ހަމައެކަނި ވަޢުދަކީ ކުޅިވަރު ވަސީލަތް ޤާއިމް ކުރުމުގެ ވަޢުދެވެ. ނަމަވެސް އަބަދު ދިރިއުޅުމުގެ ހަނގުރާމައިގައި 24 ގަޑިއިރު އުޅެމުންދާ ޒުވާނާ އެ ބުނާ ވަސީލަތްތައް ބޭނުން ކުރަން ދާނެ ވަގުތެއް ކޮބައިތޯއެވެ. ޒުވާނުންނަށް ބޭނުންވަނީ ކުޅިވަރު ވަސީލަތްތައް އެކަނި ނޫނެވެ. އާމްދަނީ އިތުރުކޯށް، ހަމަޖެހިލައިގެން ދިރިއުޅެވޭނެ ގޮތެވެ. ޒުވާނުން ތިބީ މިފަދަ ވަޢުދުތައް ވާނެ ވެރިއެއްގެ އިންތިޒާރުގައެވެ.
ރައްޔިތުންގެ އާމްދަނީ އިތުރު ކުރުމުން، އެކަމެއް ހިލޭ ނުކުރިއަސް ފުދުންތެރި ރައްޔިތުން އެކަމެއް ކުރާނެއެވެ. ދައުލަތުގެ އެހީތެރިކަން ދޭން ޖެހޭ އެންމެ ބޭނުން ޖެހެިފައިވާ މީހުންނަށް އެ އެހީތެރިކަން ފޯރުކޮށްދޭން ފަސޭހަވެގެން ދާނެއެވެ. ގައިމުވެސް އެންމެންނަށްވެސް އެ ޒުވާނޭ ވާހަކަ ކަމުގޮސްފިއެވެ. ދެން އޮތީ ހަމަ އެކަނި "ޝެއަރ" ކޮށް ނުލާ އެނާ ދެއްކި ވާހަކަތަކަށް އެދެވޭ ޖަވާބެއް ދިނުމެވެ. އެ މައްސަލަތަކަށް ސިޔާސީ ވެރިންގެ ހައްލު ހޯދައި ދިނުމެވެ.