މާލޭގެ ހުސް ބިންތަކުގެ އެކި ސަރަހައްދުތަކުގައި ރައީސް ޔާމީންގެ ކެމްޕެއިން ޕޯސްޓަރުތައް ހަރުކުރަމުންދާތީ އެމްއެންޕީގެ ކެންޑިޑޭޓް މުހައްމަދު ނާޒިމްގެ ރަސްމީ އިންތިހާބީ އެޖެންޓް އަހުމަދު އުޝާމް ނުރުހުން ފާޅު ކުރައްވައިފި އެވެ.
ވިލިމާލެ ދާއިރާގެ މަޖިލިސް މެންބަރުން ވެސް ކުރައްވާ އުޝާމް ކުރެއްވި ޓްވީޓެއްގައި ޕީޕީއެމަށް ނިސްބަތްވާ މާލޭގެ މޭޔަރު ޑރ. މުއިއްޒު ޓެގް ކުރައްވައި ވިދާޅުވީ މާލޭގެ ހުސްބިންތަކުގައި ޕީޕީއެމްގެގެ ކެންޕެއިން ޕޯސްޓަރުތައް ހަރުކުރުމުގެ ފުރުސަތު އެ ޕާޓީ އަށް ލިބިފައި އެހެން ޕާޓީތަކަށް އެ ފުރުސަތު ނުދިނުމަކީ ކައުންސިލުން ވަރަށް ބޭއިންސާފުން ކުރަމުންދާ ކަމެއް ކަމަށެވެ.
"އިންތިހާބުތަކުގަ ކެމްޕެއިން ކުރުމުގެ ހަމަހަމަ ފުރުސަތު ހުރިހާ ޕާޓީތަކަށް ވެސް ލިބެން ޖެހޭނެ. މާލޭގެ ހުސް ބިންތަކުގައި ޕީޕީއެމްގެ ގެ ކެންޕެއިން ޕޯސްޓަރުތައް ހަރުކުރުމުގެ ފުރުސަތު އެ ޕާޓީ އަށް ލިބިފައޮ އެހެން ޕާޓީތަކަށް އެފުރުސަތު ނުދިނުމަކީ މާލޭ ސިޓީ ކައުންސިލުން ވަރަށް ބޭއިންސާފުން ކުރާ ކަމެއް،" އޭނަ ވިދާޅުވި އެވެ. "މި ސަރުކާރުން ބޭއިންސާފުން ކުރާ ކަންކަމުގެ ވާހަކަ ޕީޕީއެމް އިން ތާއަބަދު ދައްކާއިރު، އެ ޕާޓީގެ ފުރިހަމަ ކޮންޓްރޯލް އޮންނަ މާލޭ ސިޓީ ކައުންސިލުގެ އަމަލުތައް ވެސް ހަމަ އެފަދައިން ހުރުމަކީ ވަރަށް ދެރަ ކަމެއް."
ޕީޕީއެމް/ޕީއެންސީން ޔާމީނަށް ކެމްޕޭން ކުރަމުން އަންނަ އިރު އެ މަނިކުފާނު ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެކަމާ ހެދި އަދި ޔާމީނަށް އިންތިހާބަށް ވާދަކުރެއްވޭނެކަމުގެ އެއްވެސް އަލިމަގެއް ފެނިފައެއް ނުވެ އެވެ.