ރައީސް އިބްރާހީމް މުހައްމަދު ކެމްޕޭނަށް އިއްޔެ ފުވައްމުލަކަށް ވަޑައިގަތުމާ ގުޅިގެން އެ ސިޓީގެ ސިޔާސީ މަސްރަހު ވަރަށް ބޮޑަށް ހޫނުވެއްޖެ އެވެ.
ރައީސާއި ފުވައްމުލަކަށް ނިސްބަތްވާ ނައިބު ރައީސް ފައިސަލް ނަސީމު އިއްޔެ ހަވީރު އެ ސިޓީ އަށް ވަޑައިގަތުމާ ދިމާކޮށް ވެސް އިދިކޮޅު ފަރާތްތަކުން މުޒާހަރާކޮށްފައިވެ އެވެ. އަދި އެކި ކަހަލަ އިބާރާތައް ލިޔެފައިވާ ބެނާތަކާއި ބޯޑުތަކާ އެކީ ރައީސާ ދެކޮޅަށް ވަފަށް ހޫނުކޮށް އިހުތިޖާޖުކޮށްފައިވެ އެވެ.
މީގެ އިތުރުން ރޭ އެމްޑީޕީން ބޭއްވި ޖަލްސާއާ ދިމާކޮށް ފުވައްމުލަކުގެ މަސްރަހު އިތުރަށް ހޫނުވެ، ފުލުހުންނާއި ޕީޕީއެމް/ޕީއެންސީގެ މެންބަރުންނާ ދެމެދު ބޮޑެތި ކުރިމަތިލުންތަކެއް ވެސް ހިނގައި، ބައެއް މީހުންނަށް އެކި ވަރުގެ އަނިޔާތައް ވެސް ލިބިފައިވެ އެވެ. ފުލުހުންނާ ދިމާއަށް ގާ އުކާ މަންޒަރު ފެންނަ ވީޑިއޯތަކެއް ވެސް އާންމުވެފައިވެ އެވެ.
ޕީޕީއެމުން ބުނެފައިވާ ގޮތުގައި ފުވައްމުލަކުން އެ ޕާޓީގެ ތިން މެމްބަރަކު ހައްޔަރުކޮށްފައިވެ އެވެ. އަދި އެ މީހުން ވަގުތުން ދޫކޮށްލަން ގޮވާލައި ރޭ އެ ޕާޓީން ބަޔާނެއް ވެސް ނެރެފައިވެ އެވެ.
ފުވައްމުލަކުން ކުރިމަތިލާން ޖެހުނު ކަންކަމާ ގުޅިގެން އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއީލް ވަނީ އެ ޕާޓީގެ ކެމްޕޭން ހަރަކާތްތަކަށް އިދިކޮޅުން ހުރަސް އަޅާ ނަމަ އެ ފަރާތްތަކަށް ވެސް ރާއްޖޭގެ އެއްވެސް ހިސާބެއްގައި ކެމްޕޭން ނުކުރެވޭނެ ކަމަށް ވިދާޅުވެ އިންޒާރު ދެއްވައިފަ އެވެ.
"އަޅުގަނޑުމެންގެ ކެމްޕޭނަށް ތާ އަބަދު އެގޮތަށް ހުރަސްއަޅާކަމަށްވާނަމަ ދިވެހިރާއްޖޭގެ އެންމެ ރަށެއްގައި ވެސް އެ ބޭފުޅުންނަށް ކެމްޕެއިނެއް ނުކުރެވޭނެ." އޭނަ ވިދާޅުވި އެވެ.
ފުވައްމުލަކުން ރޭ ފެނުނު މަންޒަރުތަކެއް ބަލާ އިރު، ރޭގެ ހަމަނުޖެހުންތަކީ ރާއްޖޭގައި ސިޔާސީ ޕާޓީތައް އުފެދިގެން އައި ދުވަސްވަރު ސިޔާސީ މަސްރަހު އެންމެ ބޮޑަށް ހޫނުވި ދަނޑިވަޅުތަކުގައި، ފެނުނު ކަހަލަ މަންޒަރުތަކެކެވެ.
އިދިކޮޅުން ރައީސާ ދެކޮޅަށް މުޒާހަރާކު އިރު، އިއްޔެ ވަނީ ޕީޕީއެމް/ޕީއެންސީގެ ކެންޑިޑޭޓް އަބްދުﷲ ޔާމީންގެ ރަނިންމޭޓަކަށް ފުވައްމުލަކަށް ނިސްބަތްވާ ޑރ. މުހައްމަދު ޖަމީލު އަހުމަދު ހަމަޖައްސައިފަ އެވެ.