ދުނިޔޭގެ ބޮޑެތި އުސް އިމާރާތްތަކަށް މާ ބޮޑު ރައްކާތެރިކަމަކާ ނުލައި އަރައި ނުރައްކާތެރި ސްޓަންޓް ހަދަމުން އައި ޒުވާނާ އިމާރާތެއްގެ މަތިން ވެއްޓި މަރުވެއްޖެ އެވެ.
ފްރާންސަށް އުފަން 30 އަހަރުގެ ރެމީ ލުސިޑީ މަރުވީ ހޮންކޮންކުގެ އިމާރާތެއްގެ 68 ވަނަ ބުރިން ވެއްޓި އެވެ. މީޑިއާތަކުން ބުނީ އޭނަ ވެއްޓުނީ އެތަނުގެ ޓްރެގެންޓާ ޓަވަރު ކޮމްޕްލެކްސްގެ 40 ވަނަ ބުރީގައި ހުރި ރައްޓެއްސަކާ ބައްދަލުކުރަން ކަމަށް ބުނެ އިމާރާތަށް އަރައިގެން އުޅެނިކޮށް އެތަނުގެ 68 ވަނަ ބުރިން ވެއްޓި ކަމަށެވެ.
ރެމީ ވެއްޓުމާ އެކީ ވަގުތުން މަރުވެފައިވާ ކަމަށް މީޑިއާތަކުން ބުންޏެވެ.
މަރުވުމުގެ ހަފުތާއެއްހާ ދުވަސް ކުރިން ހޮންކޮންގުގެ އިމާރާތްތަކެއް ފެންނަ ފޮޓޯއެއް ވެސް ރެމީގެ އިންސްޓަގްރާމްގައި ޕޯސްޓްކޮށްފައިވެ އެވެ. އޭނަގެ އެކައުންޓްގައި އެކިއެކި އުސް އިމާރާތްތަކަށް އަރައިގެން ނަގާފައިވާ ގިނަ ފޮޓޯތަކެއް ހިމެނެ އެވެ.
ރެމީ މިފަދަ ސްޓަންޓްތައް ހަދަން ފެށީ 2016 ގަ އެވެ.