ވެރިކަމުގެ ދެވަނަ ދައުރެއް ލިބިއްޖެ ނަމަ ދަރަނީގެ ބުރަ އެހެން ސަރުކާރަކަށް ނުޖައްސަވާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
އެ މަނިކުފާނު ކެމްޕޭނަށް މިހާރު ށ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އިއްޔެ މިލަންދޫގައި ވާހަކަ ދައްކަވަމުން ވިދާޅުވީ ވެރިކަމުގެ ދެ ވަނަ ދައުރަކަށް ކުރިމަތިލެއްވީ ވަކި އަމާޒެއް ހިފައިގެން ކަމަށާއި އެއީ ރާއްޖޭގެ އިގުތިސޯދު ދެ ގުނަ ކުރުން ކަމަށް ވިދާޅުވި އެވެ.
ރައީސް ވިދާޅުވީ އެ މަނިކުފާނު 2018 ގައި ވެރިކަމަށް ވަޑައިގެންނެވި އިރު ރާއްޖޭގެ އިގުތިސޯދު ހުރީ 81 ބިލިއަން ރުފިޔާގައި ކަމަށެވެ. އަދި އަހަރު ރާއްޖެ އައީ 1.4 މިލިއަން ޓޫރިސްޓުން ކަމަށާއި ދައުލަތުގެ އާމްދަނީ އަކީ 22 ބިލިއަން ރުފިޔާ ކަމަށް ވިދާޅުވި އެވެ. ނަމަވެސް، ކޮވިޑާ ހެދި އެ އާމްދަނީތައް ދަށްވިޔަސް، މި އަހަރު ނިމޭއިރު އިގުތިސޯދު 108 ބިލިއަން ރުފިޔާއަށް އަރައި، ދައުލަތުގެ އާމްދަނީ 34 ބިލިއަން ރުފިޔާ އަށް އިތުރުވާނެ ކަމަށް ވިދާޅުވި އެވެ.
މީގެ އިތުރުން އެއާޕޯޓުތައް ތަރައްގީކޮށް، ޓޫރިސްޓުން އިތުރުވާން ފެށުމުން އާމްދަނީ 130 ބިލިއަން ރުފިޔާއަށް އަރައި، ދައުލަތުގެ އާމްދަނީ ވެސް 44 ބިލިއަނަށް އަރާނެ ކަމަށް ރައީސް ވިދާޅުވި އެވެ.
އެ މަނިކުފާނު ވިދާޅުވީ ވެރިކަމުގެ ދެވަނަ ދައުރެއް ލިބި، އެ ދައުރު ނިންމަވާލައްވާ އިރު އޭގެ ފަހުން ދައުލަތުގައި ލޯނު ދައްކާ ވަރަށް ފައިސާ ހުންނާނެ ކަމަށެވެ.
"އަޅުގަނޑުގެ ދެ ވަނަ ދައުރު އިރާދަކުރެއްވިއްޔާ ނިމިގެންދާނީ މި ދެންނެވި ލޯނު ދެއްކުމަށް، ދެން އަންނަ ސަރުކާރަކަށް ނުޖައްސައި އެކަން އިރާދަކުރެއްވިއްޔާ ހަމައަކަށް އަޅުވާފައި،" ރައީސް ވިދާޅުވި އެވެ.
ރައީސް ވިދާޅުވީ ރައްޔިތުންގެ އަތްމަތި ތަނަވަސްވެ، ފުދުންތެރި ރައްޔިތުންތަކެއް އުޅޭ ތަން ފެނިގެން ދިއުމަކީ އެންމެ ބޮޑު އުފާ ކަމަށެވެ.