މާލޭގެ އޮފީހަކުން ލެޕްޓޮޕަކާއި ކަރަންޓު ނަރު ރޯލުތަކެއް ވަގަށް ނެގި އައްޑޫ ދެ މީހަކު ޖަލަށް ލުމަށް ކްރިމިނަލް ކޯޓުން ޙުކުމްކޮށްފި އެވެ.
މި މައްސަލަ އާ ގުޅިގެން ޙުކުމްކޮށްފައި ވަނީ ސ. ފޭދޫ، ނަލަރީތިގެ، މުޙައްމަދު އައިމަން، 27، އާއި ސ. ހުޅުދޫ، ރައިހާނުގެ، ޝިމްޠާން ޢަލީ، 28، ގެ މައްޗަށެވެ.
އެގޮތުން އައިމަންގެ މައްޗަށް ޙުކުމްކޮށްފައިވަނީ ހަ އަހަރާއި ތިން މަސް ދުވަހަށް ޖަލަށް ލުމަށެވެ. އަދި ޝިމްޠާންގެ މައްޗަށް ހުކުމް ކޮށްފައި ވަނީ ތިން އަހަރާއި ނުވަ މަސް ދުވަހުގެ މުއްދަތަށް ޖަލަށް ލުމަށެވެ.
މި މައްސަލަ އާ ގުޅިގެން އެ މީހުންގެ މައްޗަށް ދަޢުލަތުން އުފުލާފައި ވަނީ ވައްކަން ކުރުމުގެ ކުށުގެ ދަޢުވާ އެވެ.
ދަޢުލަތުން އެ މީހުންގެ މައްޗަށް މި ދަޢުވާ އުފުލާފައި ވަނީ އޯގަސްޓް 2، 2013 ވަނަ ދުވަހުގެ ހެނދުނުގެ ވަގުތެއްގައި، ހ. ލަންޗްމީޑްގޭގެ ފަސް ފަންގިފިލާގައި ހުންނަ ޔޫމެޓް ޕްރައިވެޓް ލިމިޓެޑް، އަދި ޔޫމެޓް ކޮންސްޓްރަކްޝަން ޕްރައިވެތް ލިމިޓެޑްގެ އޮފީހަށް ވަދެ، އައިމަން، އެ އޮފީހުން 18،000 ރުފިޔާގެ އަގުހުރި އެސަރ ބްރޭންޑްގެ ލެޕްޓޮޕެއް، އެއިގެ ދަބަހާ އެކު ވަގަށް ނަގާފައިވާ މައްސަލަ އާއި، ޝިމްޠާން އެ އޮފީހުގައި ހުރި ކަރަންޓް ވައިރު ކުރުމަށް ބޭނުންކުރާ، 3،500 ރުފިޔާގެ އަގުހުރި ހަތް ކަރަންޓް ނަރު ރޯލު ވަގަށް ނަގާފައިވާ މައްސަލައާ ގުޅިގެންނެވެ.
ދަޢުލަތުން އެ ދެ މީހުންގެ މައްޗަށް އުފުލި ދަޢުވާ ކްރިމިނަލް ކޯޓުން ބެލުމަށް ފަހު ކޮށްފައިވާ ޙުކުމުގައި ބުނަނީ، ދަޢުލަތުން ހުށަހެޅި ހެކިންގެ ހެކިބަހުން ޝަރީޢަތަށް މި ދަޢުވާ ސާބިތުވާ ކަމަށެވެ.