"ކައުންސިލާއި ރައްޔިތުން ޖެއްސުން" މިއީ ދެން އައްޑޫ ސިޓީ ކައުންސިލުގެ މާ އާންމު ބަހަކަށް ވެއްޖެ އެވެ.
ހަމަ ކައުންސިލުގެ މައްސަލައެއް ނުވަތަ ކައުންސިލަރުން ހިތްހަމަ ނުޖެހޭ ވާހަކައެއް މީހަކު ދައްކާލާ އިރަށް ދެން އެ މީހަކު އެއީ ކައުންސިލާއި ރައްޔިތުން ޖައްސަން އުޅޭ މީހަކަށް ވެ އެވެ.
ސަރުކާރުގެ މުއައްސަސާއަކުން، ކައުންސިލާއި މެދެ އެއްޗެއް ބުނާއިރަށް އެ މުއައްސަސާއެއްގެ މީހުންވެސް އެއީ ކައުންސިލާއި ރައްޔިތުން ޖައްސަން އުޅޭ ބަޔަކަށް ވީއެވެ. ކިޔާ ތަސްބީހައެއް އެއްހެން މި ބަނދިވަރު މިވެރިން މިހާރު އެބަކިއައެވެ. ނޫހަކުން ކައުންސިލާއި ބެހޭ ވާހަކައެއް ދައްކާލާއިރަށް އެ ނޫސް ވެސް ހަމަ ކައުންސިލާއި ރައްޔިތުންނާއި ޖެއްސުމުގެ މަސައްކަތް ކުރަނީ ކަމަށް ވެއެވެ.
މަގު ނެހެދޭ ވާހަކަ ދެއްކިޔަސް އެއީ ކައުންސިލާއި ރައްޔިތުން ޖެއްސުމެވެ. ނެރު ބައްތި ނުދިއްލޭ ވާހަކަ ދެއްކިޔަސް ކައުންސިލާއި ރައްޔިތުންނާއި ޖައްސަނީއެވެ. ރަށުގެ އެތަން މިތަނަށް ކުނި އަޅާ ވާހަކަ ދެއްކިއަސް ރައްޔިތުންނާއި ކައުންސިލާއި ޖެއްސީއެވެ. ރައްޔިތުންނާއި ބައްދަލު ނުކުރާ ވާހަކަ ދެއްކިއަސް ހަމަ މިގޮތެވެ. އައްޑޫގެ ތަރައްޤީއަށް ބަޔަކު ނިކުމެއްޖެ ނަމަ އެއީ ވެސް ކައުންސިލާއި ރައްޔިތުނާއި ޖައްސާ އައްޑޫ ބައިބައިކުރަން އުޅޭ ބައެކެވެ.
މިކަހަލަ ޖުމްލަ ތަކަކީ ހުދުމުހުތާރު ވެރިން، ރައްޔިތުން އޮޅުވާލުމަށް ބޭނުން ކުރާ ޒާތުގެ ޖުމްލަތަކެވެ. އަޅުގަނޑު މާ ބޮޑަށް ތަފްސީލަށް ނުދިޔަ ކަމުގައި ވިޔަސް، ރާއްޖޭގައި ކުރިން ވެރިކަން ކުރެއްވި ބައެއް ރައީސުން މިފަދަ ޖުމްލަތަށް ގިނައިން ބޭނުން ކުރައްވާކަން ފާހަގަ ކުރެވޭނެއެވެ.
"ރައްޔިތުން ބައިބައި ކުރުމާ"، "ފަރުދުން ގެ އެއްބައިވަންތަ ކަމާ އެއްބައެއްވަންތަ ކަން ގެއްލުވާލަން އުޅުން" މިއީ ހައްތަހާވެސް މިފަދަ އިބާރާތްތަކެވެ. އައްޑޫސިޓީ ރައްޔިތުން މި އިބާރާތްތަކަށް ވަރަށް ފަރިތައެވެ. ތިހެން ދަމާ ހާސަރުތަކަށް ހެއްލެނީ 80 ގެ އަހަރުތަކުގައެވެ.
ކައުންސިލްގެ ނާޤާބިލު ކަމުގެ ވާހަކަ ދައްކާ ކައުންސިލް ލައްވާ ކަންތައްތަކެއް ކުރުވަން އުޅުމީ، މިބުނާ ގޮތަށް "ކައުންސިލާ ރައްޔިތުން ޖެއްސުން" ކަމުގައި ވަނީނަމަ އަދިވެސް އެކަން އެގޮތަށް ވާނެއެވެ. އައްޑޫސިޓީއައް ތަރައްޤީގެ ކުލަވަރު އަންނަން އުޅެނީ މި ގޮތަށް "ޖައްސައިގެން" ނަމަ ނުޖައްސަންވީ ސަބަބެއް ނެތެވެ. އައްޑޫސިޓީ "ސިޓީ" އަކަށް ބަދަލުވީ ވެސް ރައްޔިތުން ނިކުމެ މިގޮތަށް މުއައްސަސާ ތަކާއި ފިސާރި ވަރުގަދަކޮށް ޖައްސައިގެންނެވެ.
ދާދި ފަހުން ފިޓް އެރޯ ގޯޅި ތެރެއަށް އަޅާފަ ހުރި ކުނިވެސް ނެގީ މިގޮތަށް ބަޔަކު މީހުން ފޭސްބުކް ގައާއި އެހެންތަންތަނުގައި ލިޔެ "ކައުންސިލާއި ރައްޔިތުންނާއި ޖައްސައިގެންނެވެ." ކަން ކަން ކުރެވެން އޮތީ ކައުންސިލާއި ޖައްސައިގެން ނަމަ ހަމަ ފިސާރި ވަރުގަދަކޮށް ޖައްސަން ވީއެވެ.
ކައުންސިލްގެ ބަހުންނަމަ ދުވަހަކުވެސް ކައުންސިލަށް ގޯސްކޮށް ކަމެއް ކުރެވިފައެއް ނެތެވެ. އަދި މުސްތަޤުބަލުގައި ވާނެހެންވެސް ހިއެއްނުވެއެވެ. ކަމެއް ނުކުރެވި އޮތަސް އޮންނާނީ އެހެން ކޮންމެވެސް ބަޔެއްގެ ނާޤާބިލުކަމުންނެވެ. ނޫނީ އެހެން ބަޔަކު ކައުންސިލަށް ޖެއްސުން ކުރާތީއެވެ.
ނޫނީ ބަޖެޓު ނުލިބޭތީ އެވެ. ކައުންސިލުން ކުރާ ގޯސް ކަމެއްގެ ވާހަކަ ދެއްކުމަކީ އެއީ އެއްވެސް ބަޔަކު ކުރުން ހެޔޮވާވަރުގެ ކަމެއް ނޫނެވެ. އެ ފަދަ ވާހަކައެއް ދެއްކުމަކީ ކަނޑައެޅިގެން އެބޭފުޅުންނާއި "ޒާތީ" ގޮތުން ޖައްސާލައިގެން އުޅުމެވެ. އެއީ "ކައުންސިލް ބަދުނާމު ކުރުމުގެ ބޭނުމުގައި ބަޔަކު އަޑީގައި ތިބެގެން ކުރުވާ ކަންކަމެވެ".
"ޒާތީވުން" މިއީވެސް އައްޑަނައެއްގެ ގޮތުން ބޭނުންކުރާ ވަރަށް މޮޅު ބަހެކެވެ. ހަމަ އެއްޗެކޭ ބުނާއިރަށް އަޑަށް ބާރުލާފައި "ޒާތީ ޒާތީ" އޭ ގޮވަން ފަށާނެއެވެ. އަޖައިބެއް ކަހަލަ ކަމެކެވެ. އެއްވެސް މީހަކު ކައުންސިލަރުން ގެ އަމިއްލަ ކަމަކާ ބެހި ހަދައެއް ނޫޅެއެވެ. އެންމެންވެސް މިދައްކަނީ ދޭންޖެހޭ ހިދުމަތްތަށް ކައުންސިލަށް ނުދެވޭ ވާހަކައެވެ.
ބޭނުންވެގެން މިއުޅޭ ތަރައްޤީ ނުލިބޭ ވާހަކައެވެ. އެއްގޮތަކަށް ވެސް ކައުންސިލަރަކު ގެ އަމިއްލަ ފޯނު ބިލު ބޮޑުވާތީ ނުވަތަ ކައުންސިލަރަކު ބޯ އޮމާންކޮށްފަ އިންނަގޮތުގެ ވާހަކަ ދައްކަމުންނެއް ރައްޔިތުންނެއް ނޫޅެއެވެ. ޒާތީވުމަކީ ކޮބައިކަން ސާފުވެއްޖެ ކަމަަށް ހީކުރަމެވެ.
ދެން އޮތީ ޒިންމާ ތަކުގެ ވާހަކައެވެ. ބަޔަކު އެއްޗެކޭ ކިޔާއިރަށް ކައުންސިލާއި ކައުންސިލުން އައްޔަންކޮށްފައި ތިބޭ "ރަނިންމޭޓުން" ވަރަށް "ސީރިއަސް" ކަމާއި އެކު ޒިންމާދާރުވުމަށް ނަސޭހަތްތެރިވާން ފަށާނެއެވެ. އަދި ވަކިން ހާއްސަކޮށް ނޫސްވެރިން ޒިންމާދާރު ވާށޭ ކިޔާނެއެވެ. މޮޅެތި ބަޔާންތަށް ނެރޭނެއެވެ. ކައުންސިލާއި "ތިމާގެ" ކުދިން ސޯޝަލްމީޑިއާތަކުގައި އިތުރަށް އެ ވާހަކަތައް ކުރިޔަށް ގެންދާނެއެވެ.
ބަލަ، ފުރަތަމަ ކައުންސިލުން އަދާ ކުރަންޖެހޭ ޒިންމާތަށް އަދާ ކޮށްފަ އެހެން މީހުން އިސްލާހުކުރަން އުޅެ ބަލާށެވެ. ބަޔަކު މީހުން ނެރޭ ނޫހެއް ޒިންމާދާރު ނުވެގެން ރައްޔިތުންނެއް ނޫޅެއެެވެ. ރައްޔިތުން މިއުޅެނީ ކައުންސިލް ޒިންމާދާރު ނުވެގެން ކުރާނެ ކަމެއް ނޭނގިގެންނެވެ. ޒިންމާދާރު ވުމަކީ ކައުންސިލުން އިންތިޒާމުކޮށް ގާތުން ކިރުދިނުމުގެ މުހިންމު ކަމާ ބެހޭ ވޯރކްޝޮޕެއް ބޭއްވި ވާހަކަ ނުވަތަ މޭޔަރު ކޮންމެވެސް ތަނެއް ޝަރަފުވެރި ކޮށްދިން ވާހަކަ ފަލަ ސުރުޙީގައި ގެނެސްދިނުން ކަމުގައިވާނަމަ، އަޅުގަނޑުމެން ތިބޭނީ ތިޔަބުނާ ޒިންމާދާރު ނޫސްވެރިކަން ނުކޮށެވެ.
ހެނދުނު ހޭލާ ބަލާ އިރު ގޭގެ ރަޖިސްޓްރީ އޮންނަނީ ބަދަލުވެފައިއެވެ. ގޯތީގައި ފައުންޑޭޝަން އަޅާފައި އަނެއް ދުވަހު ރާނަން ދާ އިރު އެހެން ބަޔަކު ހަމަ ގޯތީގައި އިމާރާތުގެ ބާކީ ބައި ރާނަން ތިބޭތަން ފެންނަނީ މަދެއްކޮށްނޫނެވެ. ވެގެން އުޅޭ ގޮތެއް ބަޔަކު މީހުން އަހާލާއިރަށް އޮންނަނީ ކައުންސިލާއި ރައްޔިތުންނާއި ޖެހިފައިއެވެ. ރައްޔިތުން ވޯޓު ދީގެން ހޮވާފައި ތިބޭ ރައްުޔިތުންގެ މަންދޫބުން އުޅޭ ނޫޅޭ ރައްޔިތުން ބަލާނެއެވެ. އެމީހުންނަށް ބަސް ކިޔާނެއެވެ.
ކޮންމެ އަކަސް "ކައުންސިލާއި ރައްޔިތުންނާއި ޖެއްސުމާއި" ގުޅޭގޮތުން ލައްކަ ގިނަ ވާހަކަ ދެކެވިއްޖެއެވެ. ހަޤީގަތުގައި ޖެހިގެން އުޅެނީ ކައުންސިލާއި ރައްޔިތުންނެއް ނޫނެވެ. ޖެހިގެން މިއުޅެނީ ކައުންސިލަރުންނާއި ކައުންސިލަރުންނެވެ. ކައުންސިލަރުންނާއި "ރަނިން މޭޓުންނާއި" އެވެ. ކަައުންސިލަރުންނާއި ދެންވެސް ތިބި ބަޔަކާއެވެ. އުފެދިގެން އުޅޭ "ފިތުނަ" އެއް އުފެދިގެން އުޅެނީ މިބައިމީހުންގެ މެދުގައެވެ. ރައްޔިތުންނަށް އެކަން އޮޅިގެން ނޫޅެއެވެ.
ރައްޔިތުންނަށް މި ވާނުވާ ވަރަށް ރަނގަޅަށް އެބަ އެގެއެވެ. ރައްޔިތުން އެދެނީ މި ހުރިހާ ކަމަކުން ކައުންސިލަރުން އެކަތި ގަނޑަކަށްވެ،
އެކި ދިމަ ދިމާލަށް އިނގިލި ދިށްނުކޮށް މިއޮތް މަދު ދުވަސްކޮޅު ތެރޭ ވެސް ކޮންމެވެސް "ކޮންސްޓަރްކްޓިވް" ކަންތައްތަކެއް ކައުންސިލަރުންގެ ކިބައިންފެނުމެވެ.