ގައުމީ ހެލްތު އިންޝުއަރެންސް ހިދުމަތް ކަމަށްވާ އާސަންދަ އަށް އޮންލައިންކޮށް އެދެވޭ ގޮތަށް ހަމަޖައްސައިފި އެވެ.
އާސަންދަ ކުންފުނިން ބުނީ "މައި އާސަންދަ" ޕޯޓަލް އިން ރާއްޖެއިން ބޭރުން ފަރުވާ ހޯދުމަށް ޑޮކްޓަރު ފުރައިދޭ ރެކޮމެންޑޭޝަން ފޯމު މި މަހު 15 ފަހުން ބަލައި ގަންނާނީ އެ ޕޯޓަލް މެދުވެރިކޮށް އެކަނި ކަމަށެވެ.
އެ ކުންފުނިން ދޭ އެހެން ހިދުމަތްތައް ވެސް ޕޯޓަލް މެދުވެރިކޮށް ހޯދޭ ގޮތަށް ވަނީ ހަމަޖައްސައިފަ އެވެ. އޭގެ ތެރޭގައި ޑޮކްޓަރުންނަށް ރެކޮމެންޑޭޝަން ފޯމު ޕޯޓަލްގެ ތެރެއިން ފުރައި ދިނުމާއި އާސަންދައިގެ އިތުރުން ވެލްފެއާގެ އެހީތެރިކަމަށް އެދި ހުށަހަޅާ ލިޔެކިޔުންތަކާއި އެޕްލިކޭޝަންގެ ސްޓޭޓަސް އާއި އެޕްލިކޭޝަން ކުރިއަށް ގެންދިއުމަށް އިތުރު ލިޔެކިޔުން ބޭނުންވާ ނަމަ، އެވެސް ޕޯޓަލްގެ ތެރެއިން ހުށަހެޅުން ހިމެނެ އެވެ.
"މައި އާސަންދަ" ޕޯޓަލް އަށް އީފާސް މެދުވެރިކޮށް ލޮގިންވެވޭނެ އެވެ.
އާސަންދަ އިން ބުނި ގޮތުގައި މި ބަދަލާއި ފަސޭހައާ އެކީ ދެން ހިދުމަތްތައް ހޯދަން ކުންފުނީގެ ކައުންޓަރަށް ނުވަތަ "ވީރާ" ކައުންޓަރަށް ދާން ނުޖެހޭނެ އެވެ. އެކަމަކު އެ ތަންތަނުން ހިދުމަތް ހޯދުމަށް ބޭނުންވާ ނަމަ، އެ ފުރުސަތު އަދިވެސް އޮންނާނެ އެވެ.