އައްޑޫ ގަމުގައި ހުރި އިމާރާތްތަކެއް ރޫޅާލައި އެތަންތަނުގެ ތަކެތި ނީލަމުގައި ވިއްކައިލަން ނިންމައިފި އެވެ.
މިކަން އިއުލާންކޮށް ގަމުގެ ބެލެނިވެރި ފަރާތުގެ ގޮތުގައި މިހާރު އޮތް ގަމުގެ އެއާޕޯޓް ވެސް ހިންގާ ކުންފުނި، އައްޑޫ އިންޓަނޭޝަނަލް އެއާޕޯޓް އޭއައިއޭ) އިން ބުނީ ރޫޅައިލާ އިމާރާތްތަކުގެ ފުރާޅާއި ފުރާޅުގެ މަތިވަޑާން ނީލަމުގައި ވިއްކާލަން ހަމަޖެހިފައި ވަނީ މި މަހުގެ 9 ގައި ކުރިއަށް ގެންދަން ނިންމާފައިވާ ނީލަމުގައި ކަމަށެވެ.
އެހެންވެ ނީލަމުގައި ބައިވެރިވާން ބޭނުންވާ މީހުން މި މަހުގެ 6 ވަނަ ދުވަހުގެ ހެނދުނު 9:30 އަށް ގަމުގައު އޭއައިއޭގެ އޮފީހަށް ހާޒިޒުވާން އެދިފައިވެ އެވެ. އަދި ނީލަމުގައި ވިއްކައިލަން ހަމަޖެހިފައިވާ ތަކެތި ކާމިޔާބުކުރާ ފަރާތްތަކުން ފަސް ދުވަހުގެ ތެރޭގައި ފައިސާ ދައްކައި ނިންމުމަށް ފަހު، 10 ދުވަހުގެ ތެރޭގައި ތަކެތި ގެންގޮސް ނިންމަން ވާނ ކަމަށް އޭއައިއޭ އިން ބުންޏެވެ.
އެ ކުންފުނިން ބުނީ ނީލަމުގައި ކުންފުނީގެ އެއްވެސް މުވައްޒަފަކަށް ބައިވެރި ނުވެވޭނެ ކަމަށެވެ. އެގޮތުން ކުންފުނީގެ މެނޭޖްމަންޓްގެ ބޭފުޅުން، ޑިޕާޓްމަންޓް/ސެކްޝަންތަކުގެ ވެރިން، އެސިސްޓެންޓް މެނޭޖަރުން އަދި ބޯޑްގެ މެމްބަރުންނާއި އެ ބޭފުޅުންގެ ޢާއިލާގެ މެމްބަރުންނަށް ވެސް ނީލަމުގައި ބައިވެރިނުވެވޭނެ އެވެ.
މިކަމާ ބެހޭ އިތުރު މައުލޫމާތު 6898214 އިން ލިބޭނެ އެވެ.
ގަމުގައި ހުރި ގިނަ އިމާރާތްތަކަކީ އިނގިރޭސީން ގަމުގައި ތިބި ދުވަސްވަރު އެ މީހުން ހަދާފައިވާ ތަންތަނެކެވެ. ނަމަވެސް 1976 ގައި އިނގިރޭސީން ގަމުން ފަބައިގެން ދިޔަ ފަހުން، ގަމުގައި ހުރި އެތައް ތަކެއްޗެއް ވަނީ އައްޑޫން ގެއްލިގެން ގޮސްފަ އެވެ. އެގޮތުން ގަމުގައި ހުރި އެތައް ހަރުމުދަލެއް ކުރިން ސަރުކާރުން މާލެ ގެންގޮސްފައިވެ އެވެ.
ގަން ފާހަގަކުރެވެނީ ރާއްޖޭގެ ފުރަތަމަ އެއާޕޯޓް ބިނާކުރި ރަށުގެ ގޮތުގަ އެވެ. އަދި ގަމަކީ ރާއްޖޭގެ ރަށެއްގައި ނަރުދަމާ އަޅައި، މަގުތަކުގައި ތާރު ވެސް ވެސް އަޅައިގެން ރަނގަޅު ފެންވަރަކަށް މަގުތައް ހެދުނު ފުރަތަމަ ރަށެވެ. ގަމުގައި ހުރި ގިނަ އިމާރާތްތައް މަރާމާތު ނުކުރެވި އެތައް އަހަރެއްވުމާ ގުޅިގެން، ގިނަ ތަންތަން ހުރީ ވަރަށް ބޮޑަށް ބާވެފަ އެވެ. އަދި މި ފަހުން ގަމުގެ ބައެއް އިމާރާތްތައް ރޫޅައިލުމުގެ މަސައްކަތް އޭއައިއޭ އިން އަންނަނީ ކުރަމުންނެވެ.
ފޭދުއާ ކޯޒްވޭއަކުން ގުޅާފައި އިތް ގަމަކީ ރާއްޖޭގައި މިހާތަނަށް އުމްރާނީ ގޮތުން އެންމެ ބޮޑު ތަރައްގީއެއް ފުރަތަމަ ލިބުނު ރަށެވެ. އިނގިރޭސިން ގަމުން ފައިބައިގެން ދިޔަ އުރި މުޅި ގަމަކީ އައްޑޫގެ އިގުތިސާދަށް ދޫކޮށްލި ބޮޑު ތަރިކައެކެވެ. އެކަމަކު ގަން ސިފަކުރެވެމުން އައިސްފައި ވަނީ ވީރާނާވަމުންދާ ތަނެއްގެ ގޮތުގަ އެވެ.