އައްޑޫން ދޫކުރަން ނިންމި ގޯތިތަކަށް އެދި ހުށަހެޅި ފޯމްތަކުގެ އިވެލުއޭޝަން މަސައްކަތް އަވަސްކުރުމަށްޓަކައި އިވެލުއޭޝަން ކޮމިޓީތަކުގެ މެމްބަރުންނަށް މަސައްކަތް ކުރާ ކޮންމެ ދުވަހަކަށް 300ރ. ގެ އެލަވަންސެއް ދޭން ހުށަހަޅައިފި އެވެ.
އެގޮތަށް ހުށަހެޅީ ކައުންސި،ލްގެ ލޭންޑް ސެކްޝަނުންނެވެ.
ކައުންސިލުން މިއަދު ބޭއްވި 109 ވަނަ ޖަލްސާ އަށް ހުށަހެޅި އެ މައްސަލައިގައި ބުނެފައި ވަނީ އިވެލުއޭޝަން ކޮމިޓީތަކުގެ މެމްބަރުންނަށް އެލަވަންސެއް ދޭން ހުށަހެޅީ، އެ މަސައްކަތް ވީހާ ވެސް އަވަކަށް ނިންމުމަށް ބާރު އެޅުމުގެ ގޮތުން ކަމަށެވެ. އެގޮތުން ކުރިއަށް އޮތް 10 ދުވަހުގެ ތެރޭގައި އިވެލުއޭޝަން މަސައްކަތް ނިންމަން ބޭނުންވާ ކަމަށް ވެސް ބުނެފައިވެ އެވެ.
ޑެޕިއުޓީ މޭޔަރު މުހައްމަދު ޝުއާއު ރިޔާސަަތުގައި އިންނަވައިގެން ބޭއްވި ޖަލްސާގައި އެ ހުށަހެޅުން ބަހުސް ހުޅުވައިލުމުން ކައުންސިލަރުންތަކެއްގެ މެދުގައި ހިޔާލު ތަފާތުވުންތަކެއް ހުރުމާ ގުޅިގެން އެލަވަންސް ދިނުމާ މެދު ވަކި ގޮތެއް ނިންމިފައެއް ނުވެ އެވެ.
އެ މައްސަލަ ލޭންޑް ސެކްޝަނުން ހުށަހެޅި ގޮތަށް ފާސްކުރަން ހިތަދޫ ކޮރަވަލު ދާއިރާގެ ކައުންސިލަރު އިބްރާހީމް ޝިނާޒް ހުށަހެޅުމުން އެކަމަށް މީދޫ ކައުންސިލަރު އައިމިނަތު ސާލިހާ ތާއީދުކުރެއްވި އެވެ.
ޝިނާޒް ވިދާޅުވީ އިވެލުއޭޝަން ކޮމިޓީތަކުގައި ކައުންސިލްގެ އިދާރީ މުވައްޒަފުންތަކެއް ވެސް އިތުރު ގަޑީގެ ގޮތުގައި ވަރަށް ގިނަ ވަގުތު މަސައްކަތް ކުރަން ޖެހިފައިވާ ކަމަށާއި އެ މީހުން މަސައްކަތަށް ގިނަ ވަގުތު ހޭދަކުރާތީ އެލަވަަންސް ދޭން ފެންނަ ކަމަށެވެ. އަދި އިވެލުއޭޝަން މަސައްކަތްތަކަށް މިހާރު ވެސް ވަރަށް ގިނަ ވަގުތު ނަގާފައިވާތީ އެކަން ވަރަށް އަވަސްކުރަން ޖެހިފައިވާކަން އޭނަ ފާހަގަކުރެއްވި އެވެ.
ނަމަވެސް ހިތަދޫ މޫލެކެޑަ ދާއިރާގެ ކައުންސުލަރު އަހުމަދު ސައީދު ވިދާޅު ވަނީ އިވެލުއޭޝަން ކޮމިޓީތަކުގައި ތިބި ކައުންސިލްގެ އިދާރީ މުވައްޒަފުންނާއި ކޮމިޓީތަކުގައި މަސައްކަތްކުރައްވާ ކައުންސިލަރުންނަށް އެލަވަންސް ދޭން ނުފެންނަ ކަމަށެވެ. އޭނަ ފާހަގަކުރެއްވި ގޮތުގައި މިހާރު ހިތަދޫ ފިޔަވައި އެހެން އަވަށްތަކުގެ ގޯތި ކޮމިޓީތަކުގެ އިވެލުއޭޝަން މަސައްކަތް ނިމިފައި އިރު، މަސައްކަތް ކުރިއަށްދާ ހިތަދޫގެ ކޮމިޓީގެ މެމްބަރުންނަށް އެކަނި އެލަވަންސެއް ލިބޭ ގޮތަށް ހަމަޖެއްސުމަކީ އިންސާފުވެރި ގޮތަކަށް ނުވާނެ އެވެ.
ސައީދު އިތުރަށް ފާހަގަކުރެއްވި ގޮތުގައި ކޮމިޓީތަކުގެ މެމްބަރުންނަށް އެލަވަންސެއް ދޭ ނަމަ ދޭން ޖެހެނީ ހަމައެކަނި ކޮންޓްރެކްޓް އުސޫލުން ކޮމިޓީތަކުގައި މަސައްކަތްކުރާ މެމްބަރުންނަށެވެ.
މަރަދޫ ކައުންސިލަރު އަހުމަދު ނާދިރު ވަނީ ކައުންސިލްގެ އިދާރީ މުވައްޒަފުންނާއި ކައުންސިލަރުން ނުހިމެނޭ ގޮތަށް އެލަވަންސް ދޭން ފެނިވަޑައިގަންނަވާ ކަމަށް ވިދާޅުވި އެވެ.
މި އަހަރުގެ ކުރީކޮޅު އައްޑޫން 1،000 ގޯއްޗަށް ހުޅުވައިލުމުން 4،000 އަށް ވުރެ ފޯމް ހުށަހަޅާފައިެވ އެވެ. ދޫކުރަން ނިންމި ގޯތިތަކުގެ ތެރޭގައި ހިމެނެނީ ހިތަދޫން ދޫކުރަން ނިންމި 500 ގޯއްޗާއި ފޭދޫން ދޫކުރަން ނިންމި 300 ގޯއްޗާއި ހުޅުމީދޫން ދޫކުރަން ނިންމި 200 ގޯއްޗެކެވެ.
ކައުންސިލުން މިދިޔަ މަހުގެ 22 ވަނަ ދުވަހުގެ ރޭ ބޭއްވި ރައްޔިތުންގެ ބައްދަލުވުމުގައި މޭޔަރު އަލީ ނިޒާރު ވިދާޅުވެފައި ވަނީ ގޯތި ލިބޭ މީހުންގެ ލިސްޓް މި މަހުގެ ތެރޭގައި އާންމުކުރެވޭނެކަމުގެ އުންމީދު ބޮޑު ކަމަށެވެ.