ރާއްޖޭގެ ހަތަރު ސިޓީގައި ބާއްވާ ގޮތަށް މި ފަހަރު ކުރިއަށް ގެންދަން ނިންމާފައި އޮތް އުރީދޫގެ މަސް ރޭސް މިއަދު ފަށަން ތައްޔާރުވެއްޖެ އެވެ.
މު މުބާރާތް ފަށަން ނިންމާފައި ވަނީ މާލެއިންނެވެ. އެ ސިޓީން މަސް ރޭހުގައި 34 ޓީމަކުން ވާދަކުރާނެ ކަމަށް އުރީދޫ އިން ބުންޏެވެ. މިއަދު މެންދުރު ފަހު މާލޭގައި މުބާރާތް ފެށުން އޮންނާނީ މެންދުރު ފަހު 2:30 ގައި މަސްވެރިންގެ ޕާކުންނެވެ.
އުރީދޫން ބުނީ މި އަހަރުގެ މުބާރާތަށް ޖުމްލަ 83 ޓީމަކުން ރަޖިސްޓްކޮށްފައިވާ ކަމަށެވެ. އެހެންވެ މިއީ މި މުބާރާތް ބާއްވަން ފެށި ފަހުން އެންމެ ގިނަ ޓީމްތަކާ އެކީ މުބާރާތް ބާއްބާ ފުރަތަމަ ފަހަރެވެ. މުބާރާތް މި ފަހަރު ކުރިއަށް ދާނީ މާލެ އާއި ކުޅުދުއްފުއްޓާއި ފުވައްމުލަކާއި އައްޑޫގަ އެވެ.
އުރީދޫ މަސް ރޭސް 2023 ގެ ތާވަލު:
* މާލެ: އޮގަސްޓް މަހުގެ 4 ގައި
* ކުޅުދުއްފުށި: އޮގަސްޓް 11 ގައި
• އައްޑޫ: އޮގަސްޓް 18 ގައި
• ފުވައްމުލައް: އޮގަސްޓް 25 ގައި
އުރީދޫން ބުނީ މާލެއިން 34 ޓީމު ބައިވެރިވާ، އިރު ކުޅުދުއްފުށިން 23. އައްޑޫން 13 އަދި ފުވައްމުލަކުން ވެސް 13 ޓީމު އެ ބައިވެރިވާ ކަމަށެވެ. މުބާރާތަށް އުރީދޫން ވަނީ ޖުމްލަ 160،000ރ. ރުފިޔާގެ އިނާމު ހުށަހަޅައިފަ އެވެ.
ކޮންމެ ސިޓީއަކުން މޮޅުވާ ޓީމުތަކަށް ލިބޭ އިނާމު:
* 1 ވަނަ ޓީމް: 25،000ރ.
* 2 ވަނަ ޓީމް: 10،000ރ.
* 3 ވަނަ ޓީމް: 5،000ރ.
* އެންމެ މޮޅު ފިރިހެން ކެޔޮޅު: 1،000ރ.
* އެންމެ މޮޅު އަންހެން ކެޔޯޅު: 1،000ރ.
އުރީދޫގެ 18 ވަނަ އަހަރީ ދުވަހާ ވެސް ގުޅުވައިގެން ބާއްވާ މި ފަހަރުގެ މަސް ރޭސް ސިޓީތަކުގައި ބާއްވާ އިރު، މުބާރާތް ސިޓީތަކުގައި ހޯސްޓްކުރަން ކައުންސިލްތަކުގެ ދައުރު ބޮޑެވެ.