ރައީސް އިބްރާހީމް މުހައްމަދު ސޯލިހުގެ ރަނިންމޭޓްކަން މުހައްމަދު އަސްލަމަށް ދޭން ނިންމާފައިވާ ކަމަށް ބުނެ ވާހަކަތަކެއް ދެކެވެން ފަށައިފި އެވެ.
ސިޔާސީ ދާއިރާގައި މަސައްކަތްކުރައްވާތާ ގިނަ އަހަރުތަކެއްވެފައިވާ އަދި އެ ދާއިރާ އިން މިހާތަނަށް ގިނަ ތަޖުރިބާތަކެއް ލިބިވަޑައިގެން ހުންނެވި އަސްލަމަކީ ހިތަދޫ އުތުރު ދާއިރާގެ މަޖިލިސް މެމްބަރެވެ. އަދި އޭނަ އަކީ އެމްޑީޕީގެ ޕާލިމަންޓަރީ ގްރޫޕް (ޕީޖީ) ގެ ލީޑަރެވެ. އަސްލަމަކީ މިހާރު އޮތް އެމްޑީޕީ އަށް ބަލާ އިރު، އެ ޕާޓީގައި އެންމެ ގިނަ ދުވަސްވީ އަދި މަޖިލީހުގެ މެމްބަރެއްގެ ގޮތުގައި ވެސް އެންމެ ތަޖުރިބާކާރު އެކެކެވެ.
އަސްލަމަށް ރައީސްގެ ރަނިންމޭޓްކަން ދޭން ނިންމާފައިވާ ކަމަށް އަޑުއަރާފައި އިރު، މި މިއަދު ނޫނީ މާދަމާ ރައީސް ރަނިންމޭޓް އިއުލާންކުރައްވާނެ އެވެ. އަދި މިކަމަށް މިހާރުގެ ނައިބު ރައީސް އަދި 2018 ގައި ރައީސްގެ ރަނިންމޭޓަކަށް ހަމަޖެއްސި ފައިސަލް ނަސީމު ވެސް ޝައުގުވެރިކަން ފާޅުކުރައްވާފައިވެ އެވެ.
ނަމަވެސް ފާހަގަކޮށްލެވޭ ކަމަކީ ފައިސަލަކީ ޖުމްހޫރީ ޕާޓީ (ޖޭޕީ) އަށް ނިސްބަތްވާ ބޭފުޅެއްކަމެވެ. އެ ޕާޓީ އަކީ މި އަހަރުގެ ރިޔާސީ އިންތިހާބަށް ވެސް ވާދަ ވެސް ކުރާ ޕާޓީ އެވެ.
މި އަހަރުގެ ރިޔާސީ އިންތިހާބުގައި ރައީސްގެ ރަނިންމޭޓަކަށް އަސްލަމް ހަމަޖައްސަން އުޅޭ ކަމަށް ވާހަކަ ދެކެވޭ އިރު، އެމްޑީޕީ ތެރެއިން އުފެދުނު އާ ޕާޓީ، ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބަކީ ވެސް އައްޑޫ ބޭފުޅެކެވެ. އަދި އޭނަ އަކީ ހުޅުދޫ ދާއިރާގެ މަޖިލިސް މެމްބަރެވެ.
ރިޔާސީ އިންތިހާބަށް ވާދަކުރާ ފަރާތްތަތަކަށް ނަން ހުށަށަޅަން އިލެކްޝަން ކޮމިޝަން އީސީ) އިން ދިން މުއްދަތު އަންނަ ހޯމަ ދުވަހަށް ހަމަވާނެ އެވެ. ރިޔާސީ އިންތިހާބު އޮންނާނީ އަންނަ މަހުގެ 9 ގަ އެވެ.