މިދިޔަ އަހަރު ނިކުތް ފިލްމް "ހޫބްސޫރަތު" އިން ބޮލީވުޑަށް ތައާރަފުވި ޕާކިސްތާންގެ އެކްޓަރު ފަވާދު ހާން ޕްރިޔަންކާ ޗޯޕްޅާ (ޕީސީ) ގެ "މެޑަމްޖީ" އަށް ސޮއިކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
ބޮލީވުޑްގެ ރިޕޯޓްތައް ބުނާ ގޮތުން ޕީސީ މަޝްހޫރު އައިޓަމް ގާލްއަކުން ސިޔާސީ މީހަކަށް ބަދަލުވާ ގޮތް ދައްކުވައިދޭ ފިލްމް "މެޑަމްޖީ" ގައި، ބަތަލެއްގެ ރޯލުން ފެނިގެން ދާނީ ފަވާދެވެ.
އެހެން ނަމަވެސް އެކަން ޕީސީ ވެސް އަދި ފަވާދު ވެސް ކަށަވަރުކޮށެއް ނުދެ އެވެ. އަދި މިކަމާ ބެހޭ ގޮތުން ފިލްމްގެ ޑައިރެކްޓަރު މަދޫރު ބަންދާކަރު ވެސް ވަކި އެއްޗެއް ބުނެފައެއް ނުވެ އެވެ.
އެހެންވެ ފަވާދު ހަގީގަތުގައި ވެސް އެ ފިލްމަށް ސޮއި ކުރިކަން އަދި އޮތީ ސުވާލު މާކެއްގެ ތެރޭގަ އެވެ.
ފަވާދަކީ ބޮލީވުޑްގެ ވަރަށް ގިނަ ޕްރޮޑިއުސަރުންނާއި ޑައިރެކްޓަރުން މިހާރު ލޯ އަމާރުވެފައިވާ ތަރިއެކެވެ. ސަބަބަކީ އޭނާގެ ރީތި ކަމަށްޓަކައި އެތައް އަންހެނުންނެއް ފަވާދަށް ފިދާވަމުން ދިއުމެވެ.
"މެޑަމްޖީ" އަކީ 2008 ގެ ރިލީޒްކޮށް، ޕްރިޔަންކާ އެންމެ މޮޅު ބަތަލާގެ ނެޝަނަލް އެވޯޑް ވެސް ހޯދި "ފެޝަން" އަށް ފަހު މަދުރު އާ އެކު މަސައްކަތް ކުރާ ފުރަތަމަ ފިލްމެވެ.
މި ފިލްމުގައި ޕްރިޔަންކާ ހަމައެކަނި އެކްޓް ކުރަނީކީ ނޫނެވެ. ފިލްމުގެ އެއް ކޯޕްރޮޑިއުސަރަކީ ވެސް އޭނާ އެވެ.