މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ކެންޑިޑޭޓް ކާނަލް މުހައްމަދު ނާޒިމްގެ ރަނިންމޭޓަކަށް ޑރ. އަހުމަދު އަދީލް ނަސީރު ހަމަޖައްސައިފި އެވެ.
އެކަން އިއުލާންކުރެއްވީ އެކަމަށްޓަކައި ރޭ ބޭއްވި ޖަލްސާއެއްގަ އެވެ.
އައްޑޫ ހިތަދު އަށް ނިސްބަތްވާ އަދީލަކީ ތައުލީމީ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރެއްވި ބޭފުޅެކެވެ. އެގޮތުން އޭނަ ހިތަދޫ ޝަރަފުއްދީން ސްކޫލްގެ ޕްރިންސިޕަލްކަން ވެސް ކުރެއްވި އެވެ. އަދީލަކީ ހިތަދޫ ސްކޫލްގެ ޕްރިންސިޕަލް ޑރ. އާސިޔަތު މުހައްމަދުދީދީގެ ފިރިކަލުންނެވެ.
އަދީލަކީ ސިޔާސީ ދާއިރާގައި އެހާ ބޮޑަށް ހަރަކާތްތެރިވެފައިވާ ބޭފުޅެއް ނޫނެނެވެ. ނަމަވެސް 2019 ގެ ރައްޔިތުންގެ މަޖިލީހުގެ ހިތަދޫ ދެކުނު ދައިރާގެ ގޮނޑި އަށް އަމިއްލަ ގޮތުން އަދީލް ވާދަކުރެއްވި އެވެ. އެ ގޮނޑި އަށް އަދީލާ ވާދަކުރައްވައި ކާމިޔާބުކުރެއްވީ އެމްޑީޕީ ޓިކެޓުގައި ވާދަކުރެއްވި އިބްރާހިމް ނާޒިލެވެ.