މި އަހަރުގެ ރިޔާސީ އިންތިހާބަކީ އައްޑޫގެ ނުފޫޒު ބޮޑު އިންތިހާބަކަށްވާނެކަމުގެ ކުލަވަރު ވަރަށް ބޮޑެވެ. ކެންޑިޑޭޓުންނާއި ރަނިންމޭޓުންގެ ތެރޭގައި ވެސް އައްޑޫގެ ބޭފުޅުން އެބަތިއްބެވި އެވެ. އެހެންވެ މިއީ މީގެ ކުރިން ރާއްޖޭގައި ބޭއްވި ރިޔާސީ އިންތިހާބެއްގައި އައްޑޫ ބައެއްގެ ހިއްސާ ނެތްހާ ބޮޑަށް، ފެންނާނެ އިންތިހާބަކަށް ވާނެ އެވެ.
ނަތީޖާ ކޮންމެ ގޮތަކަށް ނުކުތަސް ތާރީހުގެ ތެރޭގައި މި ވާހަކަ ހަމަ ގައިމު ވެސް މުހިއްމު ކަމެއްގެ ގޮތުގައި ލިޔެވޭނެ އެވެ. އެހެންވެ އަންނަ މަހުގެ 9 ގައި ބާއްވާ ރިޔާސީ އިންތިހާބާއި އައްޑުއާ އޮތްގުޅުމަށް ބަލައިލަމާ ހިނގާށެވެ.
ރައީސް އިބްރާހީމް މުހައްމަދު ސޯލިހި ދެވަނަ ދައުރަކަށް ވާދަކުރައްވާ އިރު، ރަނިންމޭޓަކަށް މި ފަހަރު ހަމަޖެއްސީ މަޖިލީހުގައި އައްޑޫ ތަމްސީލުކުރައްވާތާ ގިނަ އަހަރުތަކެއް ހޭދަކުރައްވާފައިވާ މުހައްމަދު އަސްލަމެވެ. އޭނަ އަކީ ހިތަދޫ އުތުރު ދާއިރާގެ މިހާރުގެ މެމްބަރެވެ. އަދި ރާއްޖޭގެ އެންމެ ބޮޑު ޕާޓީ، އެމްޑީޕީގެ ޕާލިމަންޓަރީ ގްރޫޕްގެ ލީޑަރެވެ.
އަސްލަމް ރަނިންމޭޓަކަށް ހަމަޖެއްސުމާ އެކީ އެމްޑީޕީގެ އިސް ބޭފުޅުންނާއި އެ ޕާޓީގެ ކޯލިޝަން ބައިވެރިން ވެސް މަރުހަބާ ކިޔައިފަ އެވެ. މި ފަހަރު ކޯލިޝަންގައި ތިބީ އަދާލަތާއި އެމްޑީއޭ އެވެ. މި ކޯލިޝަން ބުނަމުން އަންނަނީ އެއްބުރުން އިންތިހާބު ކާމިޔާބު ކުރާނެ ކަމަށެވެ.
މި އަހަރުގެ ރިޔާސީ އިންތިހާބުގައި ކެންޑިޑޭޓެއްގެ ގޮތުގައި ވެސް އައްޑޫގެ ދެ ބޭފުޅަކު އެބަތިއްބެވި އެވެ.
އެއީ ހުޅުދޫ ދާއިރާގެ މަޖިލިސް މެމްބަރު އިލްޔާސް ލަބީބާއި ކުރީގެ އެޓާނީ ޖެނެރަލް ޑރ. މުހައްމަދު މުނައްވަރެވެ. އިލްޔާސަކީ ރާއްޖޭގައި އެންމެ ފަހު އުފެދުނު ސިޔާސީ ޕާޓީ، ދަ ޑިމޮކްރެޓްސްގެ ކެންޑިޑޭޓެވެ. އެ ޕާޓީ އަކީ ކުރީގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފެއްދެވި ޕާޓީއެކެވެ.
ބެލެވޭ ގޮތުން އިލްޔާސްގެ ރަނިންމޭޓަކަށް ވާނީ މަޖިލީހުގެ ނައިބު ރައީސް އީވާ އަބްދުﷲ ނުވަތަ އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު އެވެ. އެކަން މިއަދު ކަށަވަރު ވާނެ އެވެ.
މީދު އަށް ނިސްބަތްވާ ޑރ. މުނައްވަރު އިންތިހާބުގައި ވާދަކުރައްވަން ނިންމެވީ އަމިއްލަ ގޮތުންނެވެ. ނަމަވެސް އިންތިހާބަށް މިހާ ގާތްވީ އިރު ވެސް މުނައްވަރުގެ ފަރާތުން އިންތިހާބާ ގުޅޭ މާކަ ކަމެއް ނުފެނެ އެވެ. އެހެންވެ އޭނަގެ ރަނިންމޭޓަކީ ވެސް ކާކު ކަމެއް އަދި ސާފުވާ ވަރަށް ނުވެ އެވެ.
މޯލްޑިވްސް ނެޝަނަލް ޕާޓީ (އެމްއެންޕީ) ގެ ކެންޑިޑޭޓް ކާނަލް މުހައްމަދު ނާޒިމްގެ ރަނިންމޭޓަކީ ވެސް އައްޑޫ ބޭފުޅެކެވެ. އެއީ ހިތަދު އަށް ނިސްބަތްވާ ޑރ. އަހުމަދު އަދީލް ނަސީރެވެ. ސިޔާސީ ގޮތުން މިހާތަނަށް މާ ބޮޑު ތަޖުރިބާއެއް ނެތް، އެ ދާއިރާއާ ބީރައްޓެހި މޫނެއްގެ ގޮތުގައި ފާހަގަކޮށްލެވޭ އަދީލަކީ ތައުލީމީ ދާއިރާ އިން ފާހަގަކޮށްލެވުނު ބޭފުޅެކެވެ. އޭނަ ކުރިން 2019 ގެ ރައްޔިތުންގެ މަޖިލީހުގެ އިންތިހާބުގައި ހިތަދޫ ދެކުނު ދާއިރާ އަށް ވާދަކުރެއްވި އެވެ.
މި ފަހަރު އިންތިހާބުގައި ވާދަކުރައްވާ ބޭފުޅުންގެ ތެރޭގައި ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމާއި އަމިއްލަ ގޮތުން ވާދަކުރައްވާ ކުރީގެ ހޯމް މިނިސްޓަރު އުމަރު ނަސީރު ވެސް ހިމެނިވަޑައިގަންނަވަ އެވެ. މި ބޭފުޅުން އަދި ރަނިންމޭޓުން އިއުލާން ނުކުރައްވަ އެވެ.
ކޮންމެއަކަސް މި އަހަރުގެ ރިޔާސީ އިންތިހާބު ވާނީ އައްޑޫ މީހުންނަށް ވަރަށް ހާއްސަ އިންތިހާބަކަށެވެ. ދެން އޮތީ ސެޕްޓެމްބަރު 9 ގައި ވޯޓް ފޮއްޓާ ހަމައަށް ގޮސް ނަތީޖާ އަންނާނެ ގޮތަކަށް އިންތިޒާރުކުރުމެވެ. މި ފަހަރު އައްޑޫ ނައިބު ރައީސަކު ނުވަތަ ރައީސަކު ލިބުނަސް އެއީ ތާރީހީ ގޮތުން ހަމަ ވަރަށް ހާއްސަ ކަމަކަށް ވާނެ އެވެ.