ބޭންކް އޮފް މޯލްޑިވްސް (ބީއެމްއެލް) އިން ފޭދޫގައި ބެހެއްޓި އޭޓީއެމް ބޭނުން ކުރަން ފަށައިފި އެވެ.
އެ އޭޓީއެމް ބަހައްޓާފައި ވަނީ ފޭދޫ އަވަށު އޮފީހުގެ ކައިރީގަ އެވެ. އެ މެޝިން ބޭނުން ކުރަން ފަށާފައި މި ވަނީ މަސައްކަތް ނިމިފައި ހުންނަތާ ދުވަސްތަކެއް ފަހުންނެވެ.
އޭގެ މަސައްކަތް ފެށީ މިދިޔަ އަހަރުގެ ސެޕްޓެމްބަރު މަހުގެ ތެރޭގަ އެވެ.
ފޭދޫ ބަނދަރު ސަރަހައްދުގައި ބެހެއްޓި މި މެޝިނުގެ ސަބަބުން ވަރަށް ގިނަ ބަޔަކަށް ފަސޭހަވެގެން ދާނެ އެވެ. މިއީ ބީއެމްއެލް އިން އައްޑޫގައި ބެހެއްޓި ފަސް ވަނަ އޭޓީއެމެވެ.
އޭޓީއެމްތައް މީގެ ކުރިން ބަހައްޓާފައި ވަނީ ބީއެމްއެލް ހިތަދޫ ބްރާންޗާއި ހުޅުމީދޫ އަދި މަރަދޫފޭދޫ އާއި ގަމުގަ އެވެ.
ހިތަދޫގައި އެއް ބޫތެއްގެ ތެރޭގައި ދެ މެޝިން ބަހައްޓާފައި ހުރެ އެވެ.
ފޭދޫގައި އޭޓީއެމަށް މި ބެހެއްޓުނީ އެ ވާހަކަ ދެކެވޭތާ ވަރަށް ގިނަ ދުވަސްތަކެއް ފަހުންނެވެ.
އެންމެ ފުރަތަމަ ފޭދޫގައި އޭޓީއެމެއް ބެހެއްޓުމުގެ މުހިއްމުކަން ފާހަގަކޮށް، އެކަން ބީއެމްއެލް އަށް ހުށަހަޅާފައި ވަނީ ފޭދޫގެ ޖަމިއްޔާއެއް ކަމަށްވާ އެސްޑީއައިގެ ފަރާތުންނެވެ. އެއީ 2008 ވަނަ އަހަރުގެ ތެރޭގަ އެވެ.