އެމްޑީޕީގެ ރިޔާސީ ކެންޑިޑޭޓް އަދި ރައީސް އިބްރާހިމް މުހައްމަދު ސޯލިހު މިއަދު ހުވަދު އަތޮޅަށް ކުރައްވާ ކެމްޕޭން ދަތުރުގެ ތެރެއިން ގދ. މަޑަވެލީގައި ޖަލްސާ ބާއްވަން އޮތް ތަނުގައި ހުޅުޖަހައިފި އެވެ.
ރައީސް އެ ރަށަށް ވަޑައިގަންނަވަން އޮތީ ހެނދުނު 9:00 ގަ އެވެ. ނަމަވެސް މަޑަވެލީގައި ޖަލްސާ ބާއްވަން ނިންމި ތަނުގައި ރޯކޮށްލައި ގެއްލުން ދިނުމާ ގުޅިގެން ދަތުރު މިހާރު ލަސްކޮށްފައިވާ ކަމަށް އެނގިފައިވެ އެވެ.
ޖަލްސާ ބާއްވަން ނިންމި ތަނުގައި ރޯކޮށް ގެއްލުން ދިނީ ރޭގެ ވަގުތެއްގައި ކަމަށް އެނގިފައިވެ އެވެ. އަދި އެ މައްސަލަ މަޑަވެލީގެ އެމްޑީޕީގެ ފަރާތުން ވަނީ ފުލުހުންނަށް ވެސް ރިޕޯޓްކޮށްފަ އެވެ.
ފަހަކަށް އައިސް ރާއްޖޭގެ ބައެއް އެކި ހިސާބުތަކުން ރައީސްގެ ކެމްޕޭނަށް ހުރަސް އަޅަމުންދާކަން ފާހަގަކުރެވެ އެވެ. އެގޮތުން މީގެ ދުވަސްކޮޅެއް ކުރިން އެ މަނިކުފާނި ފުވައްމުލަކަށް ވަޑައިގެން ބޭއްވި ޖަލްސާއާ ދިމާކޮށް ވެސް، އިދިކޮޅު ބަޔަކު ނުކުމެ ބޮޑެތި ހަމަނުޖެހުންތަކެއް ހިންގާފައިވެ އެވެ.