އެމެރިކާގައި މިހާރު ކޮވިޑް-19 ގެ އާ ވޭރިއަންޓެއް ފެތުރެމުންދާ ކަމަށް ބުނެފި އެވެ.
އެ ގައުމުގެ ރަސްމީ އިދާރާތަކާ ހަވާލާދީ މީޑިއާތަކުން ބުނީ މިހާރު ބާރަށް ފެތުރެމުންދާ އާ ވޭރިއަންޓަކީ އީޖީ.5 ކަމަށެވެ. މި ވޭރިއަންޓް ފެތުރޭ ނިސްބަތް 17 ޕަސެންޓަށް އިތުރުވެފައިވާ އިރު، މި ވޭރިއަންޓްގެ އިތުރު މިއުޓޭޝަނެއް ކަމަށްވާ އީޖީ.1.5 ވެސް ބާރަށް ފެތެރެމުންދާ ކަމަށް ބުނެފި އެވެ.
ކޮވިޑް އެންމެ ބާރަށް ދުނިޔޭގައި ފެތުރެމުން ދިޔަ އިރު މީގެ އެކި ވޭރިއަންޓްތައް ދުނިޔޭގެ އެކި ހިސާބުތަކުން ފެނިފައިވެ އެވެ.
މީޑިއާތަކުން ބުނި ގޮތުގައި އެމެރިކާގައި ފެތުރޭ އާ ވޭރިއަންޓާ ގުޅިގެން ބަލިވާ މީހުން އިތުރުވަމުންދާ އިރު، ހޮސްޕިޓަލްގައި އެޑްމިޓްކޮށްގެން ފަރުވާދޭން ޖެހޭ މީހުންގެ އަދަދު ވެސް ދަނީ އިތުރުވަމުންނެވެ.
ކޮލަމްބިއާ ޔުނިވަސިޓީގެ ފަރާތުން ވާހަކަ ދެއްކެވި ޑރ. ޑޭވިޑް ހޯ ވިދާޅުވި ގޮތުގައި އެ މީހުން މިހާރު އަންނަނީ އެމެރިކާ އިން ފެނުނު ކޮވިޑްގެ އާ ވޭރިއަންޓްގެ ސާމްޕަލްތައް ނަގައި އޭގެ ތަހުލީލުތަކެއް ކުރަމުންނެވެ.
މީގެ ހަތަރު އަހަރެއްހާ ދުވަސް ކުރިން މުޅި ދުނިޔެ ހުއްޓުމަކަށް ގެނައި ކޮވިޑަކީ އާންމު ބައްޔެއްގެ ގޮތުގައި ސިއްހަތު ޖަމިއްޔާ އިން މިދިޔަ އަހަރު ވަނީ ކަނޑަޅައި އަޅައިފަ އެވެ. އެމެރިކާ އަކީ މި ބަލީގައި އެންމެ ގިނަ މީހުން މަރުވި ގައުމެވެ. އެގޮތުން އެމެރިކާ އިން ކޮވިޑްގައި 1,127,152 މީހުން މަރުވެފައިވެ އެވެ.
މުޅި ދުނިޔެއިން ކޮވިޑްގައި މަރުވި މީހުންގެ އަދަދު 6,953,730 އަށް އަރަ އެވެ.