ބ. ދަރަވަންދޫ އެއާޕޯޓް އިންޓަނޭޝަނަލް އެއާޕޯޓަކަށް ބަދަލު ކުރައްވާނެ ކަމަށް މޯލްޑިވްސް ނެޝަނަލް ޕާޓީ އެމްއެންޕީ) ގެ ރިޔާސީ ކެންޑިޑޭޓް ކާނަލް މުހައްމަދު ނާޒިމު ވިދާޅުވެއްޖެ އެވެ.
ކެމްޕޭނަށް ބ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން ދަރަވަންދޫގައި ބޭއްވި ޖަލްސާގައި އޭނަ ވިދާޅުވީ އެ ރަށުގެ އެއާޕޯޓްގެ ފައިދާ އެންމެ ފުރިހަމަ ގޮތުގައި ހޯދަން މަގުފަހި ކުރަން ޖެހޭ ކަމަށެވެ. އެހެންވެ އޭނަގެ ސަރުކާރެއްގައި އެ އެއާޕޯޓް އިންޓަނޭޝަން އެއާޕޯޓަށް ބަދަލުކޮށް ދެއްވާނެ ކަމަށް ވިދާޅުވި އެވެ.
ނާޒިމު ވިދާޅުވި ގޮތުގައި ބ. އަތޮޅަކީ ގިނަ ރިސޯޓްތަކެއް ހިންގާ ސަރަހައްދަކަށްވުމާ އެކީ އެކަން ވަރަށް މުހިއްމުވެފައި ބޭނުންތެރި ކަމަށެވެ.
"މުއްސަދިން އަންނަނީ ރެއަކަށް ހަތަރު ނުވަތަ ފަސްހާސް ޑޮލަރު ދައްކަން ތައްޔާރުވެގެން. ވުމާ އެކީ މިތާނގައި ޒަމާނީ ފެންވަރުގެ އެއާޕޯޓެއް އޮންނަން ޖެހޭ،" އޭނަ ވިދާޅުވި އެވެ. "އިރާދަކުރެއްވިއްޔާ އަޅުގަނޑުގެ ސަރުކާރެއްގައި ދަރަވަންދޫ އެއާޕޯޓު އިންޓާނޭޝަނަލްކޮށް ޤައުމީ ފެންވަރަކަށް ބަދަލުކުރާނެ ވާހަކަ ދަންނަވާލަން."