ސޮއި ފޯޖުކުރި މީހަކު 198،000ރ. އިން ޖޫރިމަނާކޮށް، ގޭބަންދުކުރަން ކްރިމިނަލް ކޯޓުން ހުކުމްކޮށްފިއެ ވެ.
އެ ހުކުމް އިއްވާފައި ވަނީ ޅ. ހިންނަވަރު ފުލޫނިޔާގެ އަދީބު އުމަރުގެ މައްޗަށެވެ. އޭނަގެ މައްޗަށް އުފުލީ ސޮއި ފޯޖްކޮށް މަކަރާއި ހީލަތް ހެދުމުގެ ކުށުގެ ދައުވާ އެވެ. އަދީބުގެ މައްޗަށް އެ ދައުވާކުރީ ވިސްޓާ އިންވެސްޓްމަންޓް ފްރައިވެޓް ލިމިޓެޑުގެ އެކައުންޓުން، އެ ކުންފުނީގެ ހިއްސާދާރުންގެ ސޮއި ފޯޖުކޮށްގެން ޗެކުތަކެއް މެދުވެރިކޮށް 110،000ރ. ނެގުމާ ގުޅިގެންނެވެ.
ހުކުމުގައިވާ ގޮތުން ވިސްޓާ ކުންފުނީގެ ބޭންކް އޮފް ސިލޯނުގައި ހުޅުވާފައިވާ އެކައުންޓްގެ ޗެކުތަކެއްގައި ލިޔެ ސޮއި ފޯޖުކޮށްގެން އަދީބު ފައިސާ ނަގާފައިވާކަން ސާބިތުވެފައިވާ ކަމަށް ބުނެފައިބެ އެވެ.
ޤާނޫނުގައިވާ ގޮތުން މިފަދަ ކުށެއްގެ އަދަބަކީ ދެ އަހަރާއި 9 މަހާއި 18 ދުވަހުގެ މުއްދަތަކަށް ޖަލަށްލުމެވެ.
ނަމަވެސް ކޯޓުގައި އަދީބުގެ ފަރާތުން ވަނީ އަދަބު ޖޫރިމަނާއަކަށް ބަދަލުކޮށްދިނުމަށް އެދޭ ކަމަށާއި ވަޒީފާގައި އުޅޭ ލިޔުން ހުށަހަޅާފައިވާނެ ކަމަށެވެ. އަދި ލިޔުމުން ޖޫރިމަނާގެ ފައިސާ ދެއްކުމުގެ ޤާބިލުކަން ހުރިކަން އެނގޭ ކަމަށެވެ. އަދި މިއީ ގިނަ ދުވަސްވެފައިވާ މައްސަލައެއްކަމުން އެ ކަމަށް ރިޔާއަތްކޮށް އަދަބު ކަނޑައަޅައިދިނުމަށް ވެސް އެދިފައިވެ އެވެ.
އެހެންވެ އެ ހުށަހެޅުމަށް ރިއާޔަތްކޮށް ކޯޓުން ނިންމީ ޤާނޫނުގެ 1202 ވަނަ މާއްދާއާ ހަވާލާދީ އެ ޤާނޫނުގެ 1005 ވަނަ މާއްދާގެ ހ ގެ ދަށުން އަދީބުގެ އަދަބު ލުއިކޮށް ދިނުމަށެވެ. އެގޮތުން އަދީބު، އެއްމަހާއި ހަ ދުވަހުގެ މުއްދަތަކަށް ގޭ ބަންދަށް ބަދަލުކުރުމާ އެކީ ޖޫރިމަނާކުރީ އެވެެ.
އަދި އެ ފައިސާ މި މަހުގެ 9 ވަނަ ދުވަހުން ފެށިގެން 12 މަސް ދުވަހުގެ ތެރޭގައި މީރާއަށް ދެއްކުމަށް އަދީބުގެ މައްޗަށް ހުކުމްކޮށްފައިވެ އެވެ.