ރާއްޖެ ޓްރާންސްޕޯޓް ލިންކް އާރްޓީއެލް) ގެ ދަށުން ވަރަށް އަވަހަށް ނ. އަތޮޅުގައި ވެސް ފެރީގެ ހިދުމަތް ފަށާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
އެ މަނިކުފާނުގެ ކެމްޕޭން ދަތުރުގެ ތެރެއިން މިއަދު ޅޮހީގައި ވިދާޅުވީ އާރްޓީއެލް ފެރީގެ ނިޒާމާ އެކު ހީނުކުރާވަރުގެ ބޮޑު ކުރިއެރުމެއް ނ. އަތޮޅުގެ ރަށްތަކަށް ލިބިގެން ދާނެ ކަމަށެވެ.
"ހިތްހަމަޖެހިގެން ދަތުރު ކުރެވޭ ވަރުގެ ލޯންޗުތަކެއް މި ހޯދައިދެނީ. ނ. އަތޮޅަށް ބޮޑު ބަދަލެއް އަންނަ ތަން ފެނިގެންދާނެ." ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެ އަތޮޅަށް ބޭނުންވާ ފެރީތައް ބަންނަން މިހާރު ވަނީ ހަވާލުކޮށްފަ އެވެ. އެމްޓީސީސީގެ ދަށުން ދެމިން އަންނަ އާރްޓީއެލްގެ ފެރީގެ ހިދުމަތް އެންމެ ފަހުން ފެށީ ހުވަދޫގަ އެވެ. އެ ކުންފުނިން މިހާރު ތައްޔާރު ވަނީ އެ ނިޒާމުން އައްޑު އާއި ހުވަދޫ ގުޅައިލުމަށެވެ.
ޅޮޅީގެ ރައްޔިތުންނާ މިއަދު ބައްދަލުކުރައްވައި ރައީސް އެ ރަށަށް ވެވަޑައިގަތް ވައުދުތަކުގެ ތެރޭގައި ގިރާސަރަަހައްދު ހިމާޔަތްކުރުމާއި- ޓޫރިސްޓުންނަށް ހާއްސަ ބީޗެއް ހެދުމާއި 24 ގަޑިއިރަށް ހެލްތު ސެންޓަރު ބަދަލުކޮށް ލެބޯޓަރީއެއް ގާއިމްކުރުމާއި ސްކޫލްގެ މަލްޓިޕާޕަސް ހޯލާއި ރިސޯސް ރޫމްތައް ގާއިމްކުރުމާއި ޔޫތު ސެންޓަރެއް ހެދުމުގެ އިތުރަށް ފެނުގެ ނިޒާމްގެ މަސައްކަތް ސަރުކާރު ކުންފުންޏަކާ ހަވާލުކޮށްގެން ނިންމުން ހިމެނެ އެވެ.
"މި ކަންކަމާ އެކީ ޅޮއްސަށް ބޮޑު ބަދަލެއް އަންނާނެ. އަޅުގަނޑުމެންނަށް ބޮޑު ތާއިދެއް ލިބޭނެކަމާ މެދު ޝައްކެއް ނުކުރަން." ރައީސް ވިދާޅުވި އެވެ.