އަންނަ މަހު ބާއްވާ ރިޔާސީ އިންތިހާބަށް ވާދަކުރައްވާ ކެންޑިޑޭޓުން މިހާރު ކެމްޕޭން ކުރައްވަމުން ގެންދަވާ އިރު، ކެމްޕޭނަށް ހުރަސް އަޅާކަމުގެ ޝަކުވާތައް މިހާރު ލިބެމުންދާ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އިއްޔެ ނޫސްވެރިންނާ ބައްދަލުކުރައްވައި އެ ކޮމިޝަންގެ ނައިބު ރައީސް ވިދާޅުވޫީ ކެމްޕޭން ކުރުމަކީ ގާނޫނީ ގޮތުން ލިބިގެންވާ ހައްގެއް ކަމަށާއި އެއްވެސް ބަޔަކު ކެމްޕޭނަށް ހުރަސް އަޅައިގެން ނުވާނެ ކަމަށެވެ. އަދި ކެމްޕޭން ކުރަން ވާނީ ވެސް ގާނޫނީ އިމުގެ ތެރެއިން ކަމަށް ވިދާޅުވި އެވެ.
ހަބީބު ވިދާޅުވި ގޮތުގައި އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހުގެ ކެމްޕޭނަށް ބައެއް ރަށްރަށުން ހުރަސްއެޅިކަމިގެ ޝަކުވާތަކެއް ލިބިފައިވާ ކަމަށެވެ. މިދިޔަ ހަފުތާގައި ގދ. މަޑަވެއްޔާއި ގއ. ވިލިގިލީގެ އިތުރުން މިދިޔަ މަހުގެ ތެރޭގައި ރައީސް ފުވައްމުލަކަށް ވަޑައިގަތުމުން ވެސް ކެމްޕޭނަށް ހުރަސް އަޅަން ބަޔަކު މަސައްކަތްކޮށް، ބޮޑެތި ހަމަނުޖެހުންތަކެއް ހިންގާފައިވެ އެވެ.
އެހެންވެ ކެމްޕޭންގެ ތެރެއިން އެފަދަ ކަންކަން ފެނުމަކީ ކަންބޮޑުވާ ކަމެއް ކަމަށް އީސީން ބުންޏެވެ.
ހަބީބު ވަނީ އިންތިހާބުތަކާ ބެހޭ ގާނޫނުގައި ބަޔާން ކުރާ އުސޫލުތަކުގެ ތެރެއިން ކެމްޕޭނު ކުރުމަށް ހުރިހާ ޕާޓީތަކާއި ކެންޑިޑޭޓުންގެ އިތުރުން، އާންމުންގެ ކިބައިން ވެސް އެދިވަޑައިގެންފަ އެވެ.
"އިލެކްޝަންސް ކޮމިޝަނުން ވަރަށް ބޮޑަށް އެދޭ ކަމެއް އާންމު ފަރާތްތަކަށް ވެސް، ޕާޓީތަކަށް ވެސް، ކެންޑިޑޭޓުންނަށް ވެސް އަޅުގަނޑުމެން އިލްތިމާސް ކުރަން ބޭނުންވޭ އިލެކްޝަންސް ކޮމިޝަނުން، އިންތިހާބުތަކާ ބެހޭ އާންމު ގާނޫނުގައި މި ބަޔާންކުރާ ހަމަތަކުގެ މަތިން ކެމްޕޭނުގެ ކަންކަން ކުރަން،" އޭނާ ވިދާޅުވި އެވެ. "އެހެން ނޫނިއްޏާ މިވާ ގޮތަކީ ބައެއް ފަހަރަށް ރަށްރަށުގެ މަސްލަހަތު ގެއްލި، އަޅުގަނޑުމެންގެ މި ކުދިކުދި މުޖްތަމައުތަކުގެ އެއް ބަޔަކު އަނެއް ބަޔަކާ އަރާރުންވުމާ އަދި ފެންނަން ބޭނުން ނުވާ ކަހަލަ މަންޒަރުތައް ފެނުމަކީ ކުރިއަށް އޮތް ތާނގައި އަޅުގަނޑުމެންނަށް ހަމަ ތަންކޮޅެއް އުނދަގޫވެދާނެ ކަމަކަށްވާތީ."
ރިޔާސީ އިންތިހާބަށް 8 ކެންޑިޑޭޓަކު ވާދަކުރައްވަ އެވެ. އެއީ ޕާޓީތަކުން ވާދަކުރައްވާ ފަސް ބޭފުޅަކާއި އަމިއްލަ ގޮތުން ވާދަކުރައްވާ ތިން ބޭފުޅެކެވެ.
ރިޔާސީ އިންތިހާބު އޮންނާނީ އަންނަ މަހުގެ 9 ގަ އެވެ.
މިދިޔަ ހަފުތާގައި ހިއުމަން ރައިޓްސް ކޮމިޝަން (އެޗްސީއާރްއެމް) އިން ވެސް ވަނީ ކެމްޕޭންތަކަށް ހުރަސް އަޅައި، ހަމަނުޖެހުން އުފައްދާތީ ކަންބޮޑުވުން ފާޅުކޮށްފަ އެވެ. އެފަދަ ކަންކަން ގާތުން ބަލާނެ ކަމަށް ބުންޏެވެ.