މާލޭގެ ރައްޔިތުންނަށް ދޫކުރަން ނިންމި ގޯތީގެ ތެރެއިން ގޯއްޗެއް އައްޑޫ މީދޫ ދާއިރާގެ މަޖިލިސް މެމްބަރު ރޮޒައިނާ އާދަމް ރޮޒޭ) އަށް ވެސް ލިބިވަޑައިގެންފައިވާތީ އަމާޒުވާ ފާޑުކިޔުންތަކަށް އޭނަ ރައްދު ދެއްވައިފި އެވެ.
ޓްވިޓާގައި ރޮޒޭ ޓެގްކޮށް މިއީ "ހަމަ ޔޮވެރިކަން" ތޯ މީހަކު ސުވާލު އުފައްދުމުން ރައްދުގައި ރޮޒޭ ވިދާޅުވީ މިއީ ހަމަ ހެޔޮވެރިކަން ކަމަށާއި މާލޭގެ ރައްޔިތުންނަށް ގޯތި ދޭ އިރު އޭނަ އަށް ގޯއްޗެއް ނުލިބެން ޖެހޭ އެއްވެސް ސަބަބެއް ނެތް ކަމަށެވެ. ރައިސް އިބްރާހީމް މުހައްމަދު ސޯލިހާ ވަރަށް އަރިސް އަދި ރައީސަށް އަބަދު ވެސް ވަރަށް ބޮޑަށް ސަނާކިޔުއްވާ މެމްބަރު ވިދާޅުވީ މާލޭގައި އޭނަގެ އަމިއްލަ ގޯއްޗެއް ވެސް ނެތް ކަމަށެވެ.
Aan. Hama heyoverikan. Alhuganduge goacheh neiy. Bappa ge othee 12 bayah bahan jehey 2000 akafoot ge goacheh. Alhugandakee ves Male’ rayyitheh. Ekamu Male’ in 100 akafoot ves nulibey. So Male’ rayyithunnah goathi dhey iru alhugandah nulibeyn jehey sababeh bunedhevva! https://t.co/FWgmQOHmqr
— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 (@Roxeyna) August 14, 2023
"ބައްޕަގެ އޮތީ ބާރަ ބަޔަށް ބަހަން ޖެހޭ ދެހާސް އަކަފޫޓްގެ ގޯއްޗެއް،" ރޮޒޭ ވިދާޅުވި އެވެ. "އަޅުގަނޑަކީ ވެސް މާލޭގެ ރައްޔިތެއް. އެކަމަކު މާލެ އިން ސަތޭކަ އަކަފޫޓް ވެސް ނުލިބޭ. ސޯ މާލޭގެ ރައްޔިތުންނަށް ގޯތިދޭ އިރު އަޅުގަނޑަށް ނުލިބެން ޖެހޭ ސަބަބެއް."
ސަރުކާރުގެ "ބިންވެރިޔާ" ސްކީމްގެ ދަށުން މާލެ ސަރަހައްދުން މާލޭގެ ރައްޔިތުނަށް ދޫކުރަން ނިންމީ ގޯތި ލިބޭ މީހުންގެ ދާއިމީ ލިސްޓް އިއްޔެ ވަނީ އާންމުކޮށްފަ އެވެ. އެގޮތުން މި ފަހަރު ގޯތި ލިބޭ މީހުންގެ އަދަދަކީ 18،948 އެވެ.
ގޯތި ލިބުނު މީހުންގެ ތެރޭގައި ރޮޒޭގެ ފިރިކަލުން އަދި ކިނބިދޫ ދާއިރާގެ މަޖލިސް މެމްބަރު މުހައްމަދު ނާޝިޒު ވެސް ހިމެނިވަޑައިގަނެ އެވެ.
ބިންވެރިޔާ ސްކީމުގެ ގޯތީގެ ބޮޑު މިނާއި ދޫކުރާ ތަންތަން:
* 1،250 އަކަފޫޓު: 3،551 ގޯތި (ހުޅުމާލެ 250 ގުޅީފަޅު 260 ގިރާވަރު 3041)
* 1،650 އަކަފޫޓު: 2،802 ގޯތި (ހުޅުމާލެ 340 ގުޅީފަޅު 558 ގިރާވަރުފަޅު 1904)
* 2،050 އަކަފޫޓު: 1،547 ގޯތި (ހުޅުމާލެ 370 ގުޅީފަޅު 690 ގިރާވަރުފަޅު 487)
* 2،450 އަކަފޫޓު: 656 ގޯތި (ހުޅުމާލެ 180 ގުޅީފަޅު 476)
* 2،850 އަކަފޫޓު: 254 ގޯތި (ހުޅުމާލެ 100 ގުޅީފަޅު 154)
* 3،250 އަކަފޫޓު: 109 ގޯތި (ހުޅުމާލެ 60 ގުޅީފަޅު 49)
* 3،650 އަކަފޫޓު: 53 ގޯތި (ހުޅުމާލެ 31 ގުޅީފަޅު 22)
* 4،000 އަކަފޫޓު: 29 ގޯތި (ހުޅުމާލެ 20 ގުޅީފަޅު 9)
މީގެ ތެރެއިން، 1250 އަކަފޫޓ،ުގެ 3551 ގޯއްޗަކީ ސިންގަލް އެޕްލިކަންޓުންގެ ގޮތުގައި ހުށަހަޅައިގެން ގޯތި ލިބުނު މީހުންނެވެ. އަދި 1،650 އަކަފޫޓުގެ 2802 ގޯއްޗަކީ ދެ މީހަކު އެކުވެގެން އެޕްލިކޭޝަން ހުށަހެޅި މީހުންނެވެ. ގޯތީގެ ބޮޑުމިން ބަލާފައި ވަނީ އެޕްލިކޭޝަނަށް ޖޮއިންޓުވާ ކޮންމެ މީހަކަށް 400 އަކަފޫޓު އިތުރުުވާ ގޮތަށެވެ. ހަތަރުހާސް އަކަފޫޓުގެ 29 ގޯތި ލިބެނީ މަދުވެގެން އަށް މީހުން އެކުވެގެން އެޕްލިކޭޝަން ހުށަހެޅުމުންނެވެ.