އަންނަ މަހި ބާއްވާ ރިޔާސީ އިންތިހާބުގައި ވޯޓްލާން ބަހައްޓާނީ ޖުމްލަ 574 ވޯޓު ފޮށި ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އެ ކޮމިޝަނުން ކުރިން ބުނެފައި ވަނީ ރާއްޖެ އާއި ރާއްޖެ އިން ބޭރު ހިމެނޭ ގޮތަށް ބަހައްޓާނީ 604 ވޯޓުފޮށި ކަމަށެވެ. ނަމަވެސް ވޯޓްފޮށީގެ އަދަދު މަދުވީ ވޯޓްފޮށި ބަހައްޓަން ކުރިން ނިންމި ބައެއް ތަންތަނަށް އެކަށީގެންވާ ޢަދަދަށް މީހުން ރަޖިސްޓްރީވެފައި ނުވާތީ ކަމަށް އީސީން ބުންޏެވެ. އެހެންވެ ކުރިން ކަނޑައެޅި އަދަދަށް ވުރެ މިހާރު 30 ފޮށި މަދެވެ.
އެގޮތުން މާލެ ސަރަހައްދުގައި ބަހައްޓާނީ 176 ވޯޓުފޮއްޓެވެ. އަތޮޅު ތެރޭގައި 319 ވޯޓުފޮށި ބަހައްޓަން ނިންމާފައިވާ އިރު، 65 ރިސޯޓަކާއި ޖަލުތަކުގައި ފަސް ފޮށްޓަކާއި ހުޅުލޭގައި އެއް ފޮށި ބަހައްޓާނެ އެވެ. ރާއްޖޭން ބޭރުގައި ވޯޓުފޮށި ބެހެއްޓޭކަން މިހާތަނަށް ކަށަވަރުވެފައި ވަނީ ފަސް ގައުމެއްގަ އެވެ. އެއީ އިންޑިއާ، ސްރީ ލަންކާ، މެލޭޝިޔާ، ޔޫއޭއީ އަދި އިނގިރޭސިވިލާތެވެ.
އަށް ކެންޑިޑޭޓުންނާ އެކީ އަންނަ މަހުގެ 9 ގައި ބާއްވާ އިންތިޚާބުގައި ވޯޓުލެވޭ މީހުންގެ ޖުމްލަ އަދަދަކީ 282،395 އެވެ. އިންތިހާބު ދެވަނަ ބުރަކަށް ގޮސްފި ނަމަ އެ ބުރުގެ ވޯޓްލުން އޮންނާނީ އަންނަ މަހުގެ 30 ގަ އެވެ.