ގައުމީ އެއާލައިން މޯލްޑިވިއަންހެ ޓިކެޓް އަގުހެޔޮކޮށް، އެ އެއާލައިނަކީ ފައިދާވާ އެއްޗަކަށް ހަދާނެ ކަމަށް އެމްއެންޕީގެ ރިޔާސީ ކެންޑިޑޭޓް ކާނަލް ނާޒިމް ވިދާޅުވެއްޖެ އެވެ.
ރޭ ކުޑަހުވަދޫގައި ބޭއްވި ޖަލްސާގައި ގައުމީ މޯލްޑިވިއަންގެ ޓިކެޓްގެ އަގު ހެޔޮކުރަން ޖެހޭ ވާހަކަ ތަކުރާރުކުރައްވައި އޭނަ ވިދާޅުވީ ޓިކެޓް އަގު އޭނަގެ ސަރުކާރެއްގައި 20 ޕަސެންޓަށް ދަށްކުރާނެ އެވެ. ގައުމި އެއާލައުންގެ އަގުބޮޑުވުމަކީ ރާއްޖޭގެ ވަރަށް ގިނަ ރައްޔިތުންތަކެއްގެ ބޮޑު ޝަކުވާއެކެވެ.
އެކަމާ ބެހޭ ގޮތުން ނާޒިމު ވިދާޅުވީ މިހާރު ޓިކެޓް ވިއްކާ އަގުތަކަކީ އެންމެ އެކަށީގެންވާ އަގުތަކެއް ކަމެއް ގަބޫލެއް ނުކުރައްވާ ކަމަށެވެ.
"ކުޑަހުވަދޫ މީހުންނަށް މާލޭން ފުރައިގެން މި އަށް ވުރެ އަގުހެޔޮކޮށް އާދެވެން ޖެހޭނެ. ހަމަ އެހެންމެ ރާއްޖޭގެ އެކި ކަންކޮޅުތަކަށް ދަތުރުކުރާއިރު މި އަށް ވުރެ އަގުހެޔޮކޮށް ކުރެވެން ޖެހޭނެ،" އޭނަ ވިދާޅުވި އެވެ. ""މިއީ ހައްގު މިންވަރުތޯ؟ ސުވާލު ކުރައްވާ. އަޅުގަނޑުމެން އެބަ ޖެހޭ ހޭލަން. ތައުލީމީ ޖީލެއް ބިނާވެފައި އޮތް ގައުމެއް ތަންދޮރުފިލާ މީހުން ތިޔަ ގޮތަށް ތިއްބަވައިގެން ނުވާނެ."
ނާޒިމް ވިދާޅުވީ މޯލްޑިވިއަން އަކީ ފައިދާވާ ކުންފުންޏަކަށް ހަދައި ޓިކެޓްގެ އަގު ހެޔޮ ކުރުމަކީ ވަރަށް ފަސޭހައިން ކުރެވިދާނެ ކަމެކެވެ. އެކަމަކު އެކަން ނުވެ އޮތީ ސަރުކާރުތަކުން ގެންގުޅޭ ދޯހަޅި ސިޔާސަތުތަކުގެ ސަބަބުން ކަމަށް ވިދާޅުވި އެވެ.
ނާޒިމު ވިދާޅުވީ އައިލޭންޑް އޭވިއޭޝަން ސާވިސެސް (އައިއޭއެސް) އިން އޮޕަރޭޓްކުރާ މޯލްޑިވިއަން ހަމައަކަށް އަޅުވައި އެ ދަރަނިތަކުން ވެސް ސަލާމަތްކުރާނެ ކަމަށެވެ.
"އަޅުގަނޑަށް އެބަ ފެނޭ އޭގެ ހައްލު. މޯލްޑިވިއަން އަށް އެއާޕޯޓްގެ ގްރައުންޑް ހޭންޑްލިން ދިނީމާ އެ ކުންފުންޏަށް އިތުރު އާމްދަނީ ލިބޭނެ ގޮތް އެ ހެދުނީ،" އޭނަ ވިދާޅުވި އެވެ. "އަދި އެއާޕޯޓަށް ޖައްސާ ފީތައް ކުޑަކުރީމާ އެ ކުންފުންޏަށް ލިބޭ އާމްދަނީ އިތުރުވީ."