ސިއްހީ ހާލަތު މިހާރު ހުރި ގޮތުން އަތޮޅުތެރޭގެ ކެމްޕޭން ދަތުރު އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ކުރުކޮށްލެއްވި ނަމަވެސް އަމާޒަކީ ރިޔާސީ އިންތިހާބުގެ ކުރިން ރާއްޖޭގެ ހުރިހާ ރަށަކަށް ވަޑައިގެންނެވުން ކަމަށް ރައީސްގެ ކެމްޕޭން ތަރުޖަމާނު މާރިޔާ އަހުމަދުދީދީ ވިދާޅުވެއްޖެ އެވެ.
ނޫސްވެރިންނާ ބައްދަލު ކުރައްވައި ޑިފެންސް މިނިސްޓަރު މިއަދު ވިދާޅުވީ ރައީސް ދަތުރު ކުރުކޮށްލައްވައި މިއަދު މާލެ ވަޑައިގަތީ ރޯގާ ޖެހިވަޑައިގެންފައިވާތީ، ދަތުރު ނުކުރައްވަން ޑޮކްޓަރު ވެސް ލަފާ ދެއްވުމާ ގުޅިގެން ކަމަށެވެ. މާރިޔާ ވިދާޅުވީ ރޯގާ ކަހަލަ ކަމެއް އުޅޭ ނަމަ މި ކަހަލަ ދަނޑިވަޅެއްގައި ދަތުރުކުރުމަކީ އެހާ ރައްކާތެރި ކަމެއް ނޫން ކަމަށެވެ. އަދި ރައީސަށް އަވަސް ޝިފާއަކަށް އެދޭ ކަމަށް ވެސް މާރިޔާ ވިދާޅުވި އެވެ.
"އަމާޒަކީ ކުރިން ވެސް އޮތް ގޮތަށް އިންތިހާބުގެ ކުރިން ރާއްޖޭގެ ހުރިހާ ރަށަކަށް ރައީސް ވަޑައިގެންނެވުން." އޭނަ ވިދާޅުވި އެވެ.
ނަމަވެސް އަލުން ދަތުރު ފެއްޓޭނީ ކޮން އިރަކު ކަމެއް ދަންނަވާކަށް އެނގިވަޑައިނުގަންނަވާ ކަމަށް މާރިޔާ ވިދާޅުވި އެވެ.
ރައީސް އެންމެ ފަހުން ވަޑައިގެންނެވީ އއ. އަތޮޅަށެވެ. އަދި މިއަދު ކެމްޕޭން ދަތުރު ކުރުކޮށްލެއްވީ އދ. އަތޮޅަށް ވަޑައިގަންނަވާ ގޮތަށް ޕްލޭންކޮށްފައި އޮތްވަ އެވެ. މިހާތަނަށް ރައިސް ރާއްޖޭގެ އުތުރާއި ދެކުނުގެ ވަރަށް ގިނަ ރަށްރަށަށް ވަށައިގެންފައިވެ އެވެ.
ރިޔާސީ އިންތިހާބު އޮންނާނީ އަންނަ މަހުގެ 9 ގަ އެވެ.